શૉકિંગ, સૅડ સોમવાર..

ટ્રેનમાં ચારને વીંધી નાખતો કૉન્સ્ટેબલ ચેતનસિંહ અને મુંબઈના સુખી-સંપન્ન વેપારીની આત્મહત્યા એ બે દુર્ઘટના વચ્ચે કોઈ કૉમન કડી છે? જો છે તો કઈ?

- 

ગયા સોમવારે (૩૧ જુલાઈએ) બનેલી બે ઘટનામાં આમ જુઓ તો કોઈ સામ્ય નથી અને આમ જુઓ તો છે. દેશઆખાને હચમચાવી દેનારી પહેલી ઘટના એટલે જયપુરથી મુંબઈ સેન્ટ્રલ આવતી ટ્રેનમાં પ્રવાસીઓની સુરક્ષા માટે મળસકે પોણા ત્રણ વાગ્યે સુરતથી રેલવે પોલીસ ફોર્સ (આરપીએફ)ના ચાર કૉન્સ્ટેબલ અને એમના વડા તીકારામ મીણા ચડે છે.

સવારે સવા પાંચ વાગ્યે ૩૪ વર્ષનો કૉન્સ્ટેબલ ચેતનસિંહ એના સિનિયર ઑફિસર તીકારામ મીણા અને ત્રણ પ્રવાસીને પોતાની સર્વિસ અસોલ્ટ રાઈફલથી વીંધી નાખે છે.

ચેતનસિંહ-તીકમ મખીજાઃ એવી તે કેવી મનોઝંઝટ, જેનો અંજામ આવો ખતરનાક?

બીજી ઘટના એટલે ટ્રેનવાળી ઘટનાની પંદર મિનિટ બાદ મુંબઈના ૫૬ વર્ષી કપડાંના વેપારી તિકમ લક્ષ્મણદાસ મખીજાએ બાન્દ્રા-વરલી સી-લિન્ક પરથી અરબી સમુદ્રમાં ઝંપલાવી મોતને વહાલું કર્યું. આ લખાય છે ત્યારે (મંગળવાર, ૧ ઓગસ્ટે) સોમવાર આખો દરિયામાં તપાસ કરવા છતાં તિકમભાઈનો દેહ મળ્યો નથી. ભારતીય નૌકાદળનું હેલિકૉપ્ટર પણ એમને શોધી રહ્યું છે. ઉલ્લેખનીય છે કે ૨૦૧૨ની ૧ ઓગસ્ટે આ જ બાન્દ્રા-વરલી સી-લિન્ક પરથી રાજ ટ્રાવેલ્સના સ્થાપક લલિત શેઠે જીવનનો અંત આણેલો.