વયનો વિરોધાભાસ

વીસમી સદીમાં જન્મેલા લોકોએ આચરણમાં આસ્થા રાખી ચરણની ઉપાસના શીખવી પડશે

- હિતેન આનંદપરા

માપતો’તો આ ધરાને હું ફક્ત ત્રણ ડાફમાં

પણ ચરણ ખોટાં થયાં ક્યારે? ખબર પણ ના પડી?

ભાર જેનો લાગતો નહોતો, આ ખભા પર કદી

એમના બોજા થયા ક્યારે? ખબર પણ ના પડી.

                                                                  – મુકેશ જોગી

ભલભલા લોકોની ખબર લઈ નાખતા લોકોની ખબર લઈ લેવાનું કામ અવસ્થા કરતી હોય છે. જેઓ ઘરમંદિરમાં અહંકારને રાખી પૂજતા હોય એમને જતી જિંદગીએ સહન કરવાનો વારો આવે ત્યારે બહુ આકરું લાગે. અહમ્ હાજર હોય કે ગેરહાજર, કાળ તો સનાતન છે. એ એનું કામ કરતો રહેવાનો. કાળ વિકરાળ ત્યારે લાગે જ્યારે દેહદુ:ખ કે મનદુઃખ આપણો કબજો લઈ લે.