આભાસી આનંદનું વળગણ ઝટ છૂટે એ જ સારું..

જીવનનાં ખરાં સુખ-સંતોષથી વંચિત રહેતા લોકોને ટપાર્યે રાખવાને બદલે ખુશ થવાનું કારણ આપીએ.

- ડૉ. મિતાલી સમોવા

માનવસભ્યતાની શરૂઆતથી બે બાબતે માણસને સૌથી વધુ આકર્ષ્યા છે. પહેલી છે જુદી જુદી જાતની રમત અને બીજી છે જાતજાતનાં વ્યસન. રમત અને વ્યસન-આ બન્ને બાબત એકલા કરવા કરતાં સમૂહમાં કરવાની મજા જ જુદી હોય છે. આ બન્ને પ્રકારની મજાની માણસના સરેરાશ હૅપ્પિનેસ ઈન્ડેક્સ વધારવામાં અને મૈત્રી કે સામાજિક સંબંધ વિકસાવવામાં સૌથી મોટી મદદ મળી રહે છે.

હવે વિચારો કે માણસને રમત અને વ્યસન એ બન્નેના ચસકા કોઈ એક જ ચીજમાંથી મળી જાય તો તો સોને પે સુહાગા થઈ જાય ને?! જેમ કે જાત-ભાતની ઑનલાઈન ગેમ્સ.

તમે જોજો, મોટા ભાગના વ્યસનીઓના બહુ બધા વ્યસની મિત્રો હોય છે.

આ સામે નિર્વ્યસની વ્યક્તિને મિત્રો બનાવવામાં વધુ મુશ્કેલી નડે છે. અલબત્ત, આવો કોઈ નિયમ નથી, પરંતુ કોઈ બાબતે શોખ પર સંયમ હોય અને શોખ ક્યારે ગાંડપણ કે બીમારીની હદે પહોંચી જાય એમાં આસમાન-જમીનનો ભેદ છે. શાણા માણસો આવાં વ્યસનોને શોખની કક્ષા સુધી જ સીમિત રાખતા હોય છે.