પિક્ચર ક્યાં સુધી બાકી જ રહેશે?

હોલીવૂડના લેખકોની ઐતિહાસિક હડતાળમાં કલાકારો પણ જોડાતાં ફિલ્મનાં શૂટિંગ ઉપરાંત નિર્માતા-આયોજકોની અનેક યોજના ઊંધી વળવાનો ભય ઊભો થયો છે.

- 

બીજાં ક્ષેત્રોની જેમ અમેરિકાના મનોરંજક ઉદ્યોગને પણ મૉડર્ન ટેક્નોલૉજી પડકારરૂપ લાગે છેઃ સર્જનાત્મક કાર્યો આર્ટિફિશિયલ ઈન્ટેલિજન્સ કરવા માંડશે તો?

દેવોની નગરી તરીકે જાણીતા અમેરિકાના લોસ એન્જલિસમાં ધબકતી ફિલ્મ ઈન્ડસ્ટ્રી ત્રણેક મહિનાથી ઠપ છે.. અને અમેરિકન ચિત્રનગરીમાં બે મેથી શરૂ થયેલી લેખકોની હડતાળમાં ઍક્ટર્સ પણ જોડાયા છે. આનાથી અમેરિકન ફિલ્મો, ટીવી શો, વેબ-સિરીઝના તલબગારોને એમનો રેગ્યુલર એન્ટરટેઈન્મેન્ટ ડોઝ તો નહીં મળે, પણ ઓસ્કાર જેવા ફિલ્મ એવૉર્ડ્સ તથા કોલોરાડો, ટોરન્ટો, વેનિસ જેવા આંતરરાષ્ટ્રીય ફિલ્મોત્સવનેય ઝાંખા પાડશે. સ્ટારલોકોના ઈન્ટરવ્યૂ, કારમાંથી ઊતરીને લાલ જાજમ પર ચાલે એના ફોટા, ખાસ ફિલ્મ સ્ક્રીનિંગ, વગેરેનું શું? કેમ કે એમાં કોઈ આવવાનું નથી. અને જો સ્ટાર્સ જ આવવાના ન હોય તો ફિલ્મ ફેસ્ટિવલ યોજવાનો પણ કોઈ મતલબ નથી, કેમ કે એમાં કોઈ સ્પૉન્સર મળે નહીં. કોવિડ કાળમાં ઝૂમ પર ફિલ્મ ફેસ્ટિવલ યોજાતા તો એમાં કમ સે કમ નોમિનેટ થયેલા સ્ટાર્સ તો આવતા. હવે ઝૂમ પર પણ હાજરી નહીં હોય.