ઈક પ્યાર કા નગ્મા હૈ..

મુકેશજીની શતાબ્દીયાત્રા નિમિત્તે એમના પુત્ર નીતિન મુકેશ આવતા મહિને સાજિંદાના કાફલા સાથે અમેરિકા-કેનેડાની ટૂર પર રવાના થશે

- રઘુ જેટલી

મુકેશચંદ માથુર જન્મશતાબ્દી

૨૨-૭-૧૯૨૩ - ૨૨-૭-૨૦૨૩

આમ તો ધીમું ધીમું સંગીત ક્યારનુંય ગુંજતું હતું, હવે બાજાં બજવા માંડ્યાં છે. દંતકથા સમા ગાયક મુકેશચંદ જોરાવરચંદ માથુરના પ્રશંસકોએ એમની જન્મશતાબ્દીની ઉજવણી શરૂ કરી દીધી છે. મુકેશજીની શતાબ્દીયાત્રા નિમિત્તે એમના પુત્ર નીતિન મુકેશ આવતા મહિને સાજિંદાના કાફલા સાથે અમેરિકા-કેનેડાની ટૂર પર રવાના થશે. એમની વિદાયનાં ૪૭ વર્ષ બાદ આજે હવે શું લખવું.. કેટલીક છૂટીછવાયી વિચારકણિકા.

જેમ કે.. મુકેશજીનો જન્મ ૨૨ જુલાઈ, ૧૯૨૩ના રોજ દિલ્હીમાં. દસ ભાઈ-બહેનમાં એમનો નંબર છઠ્ઠો. પબ્લિક વર્ક્સ ડિપાર્ટમેન્ટમાં જૉબ કરતા મુકેશજી તે વખતે કુંદન લાલ સાયગલના અવાજમાં ગાતા. એમના દૂરના રિલેટિવ, હિંદી સિનેમાના અદ્ભુત અદાકાર મોતી લાલે એક કાર્યક્રમમાં મુકેશને સાંભળ્યા ને એમને મુંબઈ તેડી લાવ્યા.

જેમ કે.. ૧૯૪૫માં એમણે ફિલ્મ પેહલી નઝર માટે દિલ જલતા હૈ તો જલને દે રેકૉર્ડ કર્યું તો એ સાંભળીને સાયગલ દિંગ થઈ ગયાઃ આ ગીત મેં ક્યારે ગાયું? સિંગર મુકેશ આમ પાછા લાગે હૅન્ડસમ એટલે એમને ૧૯૪૧માં આવેલી ફિલ્મ નિર્દોષમાં હીરો તરીકે લેવામાં આવેલા. એ પછી એમને ઍક્ટિંગની ઘણી ઑફર આવી, પણ એમણે ગાયકી પર ધ્યાન કેન્દ્રિત રાખ્યું. ફર્સ્ટ સોન્ગ રેકૉર્ડ કર્યું: દિલ હી બુઝા હુઆ હો તો ફસ્લ-એ-બહાર ક્યા..