વાવાઝોડા-વરસાદે વેરેલી તબાહીની કળ ઝટ નહીં વળે..

‘બિપરજૉય વાવાઝોડું..’ લગભગ એક સપ્તાહ સુધી સરકારી તંત્રમાં આ શબ્દોએ ભારે તોફાન મચાવ્યા બાદ નેતાઓ તો ૨૦૨૪ની ચૂંટણીના કામમાં લાગી ગયા છે, પરંતુ સૌરાષ્ટ્ર, કચ્છ તથા ઉત્તર ગુજરાતનાં ગામડાં ખૂંદીએ તો ખબર પડે કે આનંદ જેવો અર્થ ધરાવતો બિપરજૉય શબ્દ ખેડૂતો માટે પારાવાર દુઃખ લાવ્યો છે.

- હેતલ રાવ (અમદાવાદ) । દેવેન્દ્ર જાની (રાજકોટ) । સુનીલ માંકડ (ભૂજ)

નજર પડે ત્યાં સુધી ખેતરો જળબંબાકાર.. હવે આમાં ખેતી ક્યારે શક્ય બનશે?

અમારી પાસે તો કંઈ બોલવા જેવું નથી, બે'ન હવે તો બધુંય રામ જાય અને લિસોટા રહી જાય એવું અમારી સાથે બની ગયું. માંડ માંડ પૈસો–પૈસો ભેગો કરીને ખેતી કરીએ અને આ વરસાદે તો બધુંય લૂંટી લીધું. મારો મીઠુડો (બળદ) ભોગ બન્યો. સરકાર પૈસા આપશે, પણ હજુ તો સરવે હાલે છે, કોણ જાણે ક્યારે પતશે અને અમને મદદ મળશે. મારું તો ઘર પણ પડી ગયું, પરિવાર સાથે ગમે ત્યાં દોડા કરવાનો દા'ડો આવ્યો છે..

આ શબ્દો છે બનાસકાંઠાના કોટડા ગામના પરસોત્તમભાઈ ધનજીના, જેમણે ૧૫-૧૬ જૂન વચ્ચે ત્રાટકેલા બિપરજૉય વાવાઝોડા અને ત્યાર પછીના વરસાદમાં પોતાનું ઘર, ખેતર અને બધું ખોયું છે.

બિપરજૉય વાવાઝોડું સક્રિય થઈ રહ્યું હોવાના વાવડ તો સાત-આઠ જૂનથી આવવા લાગ્યા હતા અને એ ગુજરાત તરફ આગળ વધી રહ્યું હોવાનું પણ પછી પાક્કું થઈ ગયું હતું એટલે પ્રશાસનતંત્ર બધી રીતે સજ્જ હતું, છતાં પણ સૌરાષ્ટ્ર-કચ્છ પર કહેર વરસાવી વાવાઝોડું ઉત્તર ગુજરાતની દિશામાં ફંટાયું, એની સાથે જે વરસાદ પડ્યો એણે બનાસકાંઠા, પાટણ, મહેસાણા અને સાબરકાંઠા જિલ્લાનાં અનેક ગામોનાં ખેતરોને પાણીમાં ગરકાવ કરી દીધાં, કંઈકેટલાંય ઘરને નુકસાન પહોંચાડ્યું અને પશુધનનો ભોગ લીધો.

છેલ્લા ઘણા સમયથી આ વિસ્તારોમાં પાણીની અછત હોવાથી સિંચાઈ માટે ખેડૂતોએ જળસંચયનો નિર્ણય કર્યો હતો. બનાસકાંઠાના વ્યાપાર કેન્દ્ર સમા ડીસા તાલુકાના પેછડાલ ગામમાં લાખો રૂપિયાના ખર્ચે ૧૩ ખેત તલાવડી બનાવવામાં આવી હતી. સિંચાઈ માટેનું પાણી તો ઠેરનું ઠેર રહ્યું, વાવાઝોડાની અસરથી જે ભારે વરસાદ થયો એમાં આ તલાવડી તૂટી ગઈ. ડીસા ઉપરાંત આસપાસના થરાદ અને ધાનેરા સહિતના અનેક વિસ્તારોમાં ખેતરમાં વસવાટ કરતા લોકોનાં ઘરોમાં પાણી ભરાઈ ગયાં, જેથી અનાજ, ઘરવખરી બધું જ ખરાબ થઈ ગયું.