બ્રેક લો અને બેલેન્સ જાળવો.

શરીરની જેમ સતત ચાલતા રહેતા દિમાગને પણ વચ્ચે વચ્ચે આરામની જરૂર છે.

- ડૉ. અપર્ણા દેશમુખ

ક્રિકેટર વિરાટ કોહલી, જાણીતી અમેરિકન ગાયિકા સેલેના ગોમેઝ, ઑલિમ્પિક્સ મેડલ વિજેતા સ્વિમર માઈકલ ફેલ્પ્સ, અભિનેત્રી દીપિકા પાદુકોણ..

આ બધી વ્યક્તિઓ વચ્ચે શું સમાનતા છે એ જાણો છો? આ બધી જ વ્યક્તિ અને એમના જેવી ઘણી સેલિબ્રિટીએ પોતાના માનસિક સ્વાસ્થ્યને ખાસ ધ્યાન આપવા કામથી રજા લીધી હતી એટલે કે મેન્ટલ હેલ્થ બ્રેક.

આવા મેન્ટલ હેલ્થ બ્રેકની જરૂર ફક્ત અતિ સફળ અને અતિ વ્યસ્ત રહેતી વ્યક્તિને જ હોય છે એમ નથી. તમારા અને મારા જેવા સામાન્ય માણસોને પણ એની જરૂર પડે છે. વર્ક લાઈફ બૅલેન્સ આ શબ્દો તો તમે સાંભળ્યા જ હશે, તો આનો ખરો અર્થ શું છે?

કાર્ય એ આપણા જીવનનો એક મહત્ત્વપૂર્ણ ભાગ છે. કોઈ પણ પ્રકારનું કામ આપણા માનસિક સ્વાસ્થ્ય માટે ફાયદાકારક હોય છે. કામમાં વ્યસ્ત રહેતું મગજ માનસિક બીમારીથી તમારો બચાવ કરી શકે. માણસ પાસે કામ ન હોય એટલે એને દિમાગમાં હજાર આડાઅવળા ખોટા વિચાર આવે, જે એનું માનસિક આરોગ્ય બગાડી શકે. ટૂંકમાં, માણસ કોઈ ને કોઈ રીતે કામમાં રહે એ જરૂરી છે.

અલબત્ત, ફક્ત કામ નહીં, પણ એની આસપાસનું વાતાવરણ પણ માનસિક સ્વાસ્થ્ય માટે અનુકૂળ હોવું જોઈએ. તનાવપૂર્ણ વાતાવરણમાં કામ કરવું માનસિક બીમારીને આમંત્રણ આપવા જેવું છે.