રશિયામાં બળવો: પુતિનનું હવે શું થશે?

વ્લાદિમીર પુતિને જે રાક્ષસ પાળેલો એણે જ બળવો કરીને પુતિનને ભરખી જવાનો પ્રયત્ન કર્યો. આ બળવા બાદ પુતિનની લોખંડી શાસક તરીકેની પ્રતિષ્ઠા ગંભીર રીતે ખરડાઈ છે. રશિયામાં આવતે વર્ષે પ્રમુખપદની ચૂંટણી છે અને એમાં હવે શું ખેલો થાય છે એ જોવાનું મહત્ત્વનું બની રહેશે.

- બિમલ મહેશ્વરી

જેવું કરો એવું ભરો કે પછી હાથનાં કર્યાં હૈયે વાગે.. આ બન્ને કહેવત રશિયાના પ્રમુખ વ્લાદિમીર પુતિનને બરાબર લાગુ પડે છે. એમણે એક અસુરને પાળ્યો અને આ અસુર જ એમને ભરખી જવાની તૈયારીમાં હતો.. પણ પુતિન બચી ગયા.

રશિયામાં હમણાં પુતિન સામે જે બળવો થયો એ માટે એ પોતે જ જવાબદાર છે. ટોચના સત્તાધીશો વચ્ચે ચાલતા અંદર અંદરના ઝઘડામાં ઘી હોમવું અને એમાંથી લાભ ઉઠાવવો એ પુતિનની કાયમી નીતિ રહી છે અને આ બળવા પાછળનું મુખ્ય કારણ પણ આ જ હોવાનું મનાય છે.

૨૪ કલાક ચાલેલા બળવા પાછળ એક ખાનગી સેનાનો હાથ હતો અને આ સેનાનો ચીફ ચેવગેની પ્રિગોશીન એક સમયે પુતિનનો એકદમ નજીકનો સાથી હતો. આ સંબંધોને કારણે એ શક્તિશાળી રાક્ષસ બની ગયો હતો. એ પુતિનને ભરખી શક્યો નહોતો, પણ એણે પુતિનના લોખંડી શાસનમાં ગાબડાં જરૂર પાડી દીધાં છે.

યેવગેની પ્રિગોશીનની ખાનગી સેના ચલાવતી કંપનીનું નામ વાગનર છે. આ ખાનગી સેનાને શસ્ત્રસરંજામ રશિયન સરકાર તરફથી મળે છે. વાગરની સેના યુક્રેન સહિત ૩૦ જેટલા દેશોમાં ગોઠવાયેલી છે, જેમાં સિરિયા, લિબિયા અને સેન્ટ્રલ આફ્રિકાના અમુક દેશોનો સમાવેશ છે. પુતિન જ્યાં સીધી રીતે હસ્તક્ષેપ કરી ન શકે ત્યાં એ આ ખાનગી સેના મારફતે હસ્તક્ષેપ કરી પોતાનું ધાર્યું કરાવે છે. ટૂંકમાં, વાગનરની ખાનગી અને ગુપ્ત સેના પુતિનની તાકાતને અત્યાર સુધી બળવત્તર કરતી હતી.