શું અને કેવીક છે આ વાઘા બોર્ડર?

પ્રસંગ, સ્થળ, કાળને અનુરૂપ વેશભૂષા હોવી જોઈએ એ વાત નવીનવાઈની નથી, પરંતુ હમણાં દિલ્હી નજીકની એક હાઉસિંગ સોસાયટીએ આ વિશેના નિયમ જાહેર કરીને ચર્ચા છેડી છે અને નિષ્ણાતો ક્યારે કેવા વાઘા પહેરવા એ વિશે ઝીણામાં ઝીણું કાંતી રહ્યા છે ત્યારે ડ્રેસ કોડનાં ભૂતકાળ-વર્તમાન ચકાસવા રસપ્રદ બની રહેશે.

- કેતન મિસ્ત્રી (મુંબઈ)

થોડા સમય પહેલાં લોકપ્રિય ટીવીસિરિયલ તારક મેહતા કા ઉલ્ટા ચશ્માના ભૂતપૂર્વ તારક મહેતા એટલે કે અભિનેતા-કવિ-વક્તા શૈલેશ લોઢાને સાવ અનાયાસ એક કાર્યક્રમમાં મળવાનું થયેલ ત્યારે કોરોના ને લૉકડાઉન અને એની અસર વિશે ચર્ચા નીકળતાં કોઈએ મમરો મૂક્યોઃ શૈલેશજી, આ વિશે તમે કવિતા લખી છે?

તો શૈલેશ લોઢાએ આ પંક્તિ કહીઃ અય કોરોના ક્યા પઢૂં કશિદા તેરી શાન મેં.. દો સાલ નિકલ ગયે કચ્છ-બનિયાન મેં.. અર્થાત્ હે કોરોના, શું ગાઉં ગુણગાન તારાં, બે વર્ષ નીકળી ગયાં ચડ્ડી-બનિયાનમાં અમારાં..

કોરોનાના પગલે આવેલા લૉકડાઉને હાફ પૅન્ટ્સની આદત એવી લગાડી દીધી કે..

અહીં કવિ શું કહે છે એ સમજાવવાનું પલક-લેખક હિતેન આનંદપરા પર છોડીને સીધા મૂળ મુદ્દા પર આવી જઈએ. લૉકડાઉને કંઈકેટલી આદતો બદલી એમાંની એક તે ટી-શર્ટ, અડધા પાટલૂનથી ચલાવી લેવું. અગત્યની ઝૂમ મીટિંગ હોય ત્યારે બૉક્સર શૉર્ટ્સ પર સરસમજાનાં શર્ટ-ટાઈ ચડાવી દેવાનાં. જાણે એક વણલખ્યો ડ્રેસ કોડ નક્કી થઈ ગયો.

મુદ્દો હજી વધુ સ્પષ્ટ કરીએ તો એકાદ અઠવાડિયાથી છાપાં, ટીવીચૅનલોમાં ડ્રેસ કોડ શબ્દ ગાજે છે. વાત એમ છે કે દિલ્હીને અડીને આવેલા ગ્રેટર નોઈડાસ્થિત હિમસાગર સોસાયટીના રેસિડેન્ટ્સ વેલ્ફેર ઍસોસિયેશને રહેવાસીઓ માટે વેશભૂષાસંહિતા બહાર પાડી રહેવાસીઓને વિનંતી કરી કે ભાઈઓ અને બહેનો, સોસાયટીના કમ્પાઉન્ડમાં હરતાંફરતાં હો ત્યારે તમારા પોશાક અંગે કોઈ વાંધાવચકા ન કાઢે એનું ખાસ ધ્યાન રાખજો. ખાસ તો, લુંગી અને નાઈટી જેવા ઘરમાં પહેરાતાં કપડાંમાં કમ્પાઉન્ડમાં નીકળી ન પડશો.

બર્મ્યુડા, લુંગી, નાઈટી, ગંજી-ચડ્ડીઃ હાઉઝિંગ સોસાયટીના પદાધિકારીઓનું કહેવું છે કે નાઈટ ટાઈમનાં વસ્ત્રો ડે ટાઈમે પહેરીને સોસાયટીમાં કે ચાહે ત્યાં ફરવું ઉચિત ન ગણાય.