બચત નાની.. રકમ આવે મોટી

ગયા બજેટમાં સરકારે વરિષ્ઠ નાગરિકો માટેની બચત યોજનાની વ્યક્તિદીઠ મર્યાદા ૧૫ લાખથી વધારી બમણી એટલે કે ૩૦ લાખ રૂપિયાની કરી

- જયેશ ચિતલિયા

સરકારની અમુક રાષ્ટ્રીય લઘુ બચત યોજનાઓમાં ભરપૂર નાણાપ્રવાહ આવી રહ્યો છે, ખાસ તો વરિષ્ઠ નાગરિકો માટેની સ્કીમમાં રોકાણમર્યાદા વધાર્યા પછી અને મહિલા સમ્માન યોજના શરૂ કર્યા બાદ બચતકારો અને ભંડોળનું પ્રમાણ વધી રહ્યું છે. બીજી બાજુ, કેટલીક સરકારી બચત યોજનામાં બનાવટી નામે રોકાણ કરવાના કિસ્સા પણ પ્રકાશમાં આવતાં આવકવેરા વિભાગ સક્રિય થયો છે.

લઘુ બચત યોજના છલાંગ મારતી જાય એવો માહોલ રચાયો છે. ખાસ તો વરિષ્ઠ નાગરિકો માટેની અને મહિલાઓ માટેની બચત યોજનાને નોંધપાત્ર પ્રતિસાદ મળી રહ્યો છે. ગયા બજેટમાં સરકારે વરિષ્ઠ નાગરિકો માટેની બચત યોજનાની વ્યક્તિદીઠ મર્યાદા ૧૫ લાખથી વધારી બમણી એટલે કે ૩૦ લાખ રૂપિયાની કરી હતી. આ ઉપરાંત, મહિલાઓ માટે મહિલા સમ્માન યોજના નામની ખાસ નવી યોજના બહાર પાડી હતી.