આ બાળકીના નસીબમાં કેમ છે માતા-પિતાનો વિયોગ?

જર્મનીમાં જન્મેલી ગુજરાતી પરિવારની બાળકી સાતમા મહિને આકસ્મિક ઘાને લીધે હૉસ્પિટલ પહોંચી. ત્યાંથી એને હોમના બદલે ફોસ્ટર હોમમાં જવું પડ્યું.. અને હમણાં એનું ‘સરનામું’ ફરી બદલાયું છે. આ વિવાદની ગઈ કાલ, આજ અને સંભવિત આવતી કાલનો ચોંકાવનારો અહેવાલ.

- મહેશ શાહ (વુલ્ફસબર્ગ-જર્મની)

અત્યારે એ ૨૭ મહિનાની બાળકી છે. જો કે કમનસીબી એ કે પાછલા બન્ને બર્થડ વખતે એ પોતાના ઘર-પરિવાર સાથે નહોતી. એનાં માતા-પિતા માટે એ બે જન્મદિન કેવા વિત્યા એ તો એ જ જાણે. એમને આજેય દીકરીનો વિરહ સતાવે છે. આઘાતજનક વાત એ કે બાળકી ગુમ થઈ નથી, પરંતુ જર્મનીના જાલિમ કાયદાએ એને પરિવારથી વિખૂટી કરી છે.

વાત વિગતે જાણીએ. અમદાવાદનાં એમબીએ થયેલાં ધારા શાહ અને મુંબઈના આઈટી એન્જિનિયર ભાવેશ શાહે ડિસેમ્બર, ૨૦૧૬માં લગ્ન કર્યાં. પછી કમાવા માટે ઓગસ્ટ, ૨૦૧૮માં જર્મનીના બર્લિન ગયાં. ત્યાં ૨૦૨૧ના ફેબ્રુઆરીમાં દીકરી અરિહાનો જન્મ થયો. ધારાએ જૈન આચાર્ય રાજહંસસૂરીશ્વરજી પ્રેરિત સંસ્કાર શક્તિ ગર્ભસંસ્કરણ કેન્દ્રમાં ઑનલાઈન ગર્ભ સંસ્કાર વિધાન કરાવેલું.

એ દિવસોમાં પૌત્રી અરિહાને રમાડવા મુંબઈથી ભાવેશનાં મમ્મી જર્મની આવેલાં. એમણે સોળ સપ્ટેમ્બરે રાત્રે ડાયપર પહેર્યા વિના ઘરમાં રમતી અરિહાના ગુપ્તાંગ ભાગે જરાક લોહી જોયું એટલે સાફ કર્યું. બીજી સવારે સાસુ-વહુ અરિહાને હૉસ્પિટલ લઈ ગયાં. ત્યાં ડૉક્ટરે તપાસીને ત્રણ દિવસ બાદ આવવા કહ્યું. બીજી વાર અરિહાને બે દિવસ ઍડમિટ કરીને જુદી જુદી ટેસ્ટ કરી. જો કે કોઈક ડૉક્ટરે અરિહાના ગુપ્તાંગમાં લોહીનું કારણ જાતીય શોષણ ધારી લીધું અને શંકાના આધારે બર્લિનસ્થિત ચાઈલ્ડ વેલ્ફેર સર્વિસ અને પોલીસને હૉસ્પિટલમાં બોલાવી. બન્ને ટીમે અરિહા એનાં માતા-પિતા સાથે સુરક્ષિત ન હોવાનો એકપક્ષીય નિર્ણય લઈને અરિહાના ટેસ્ટના રિપોર્ટ ન આવે ત્યાં સુધી એને ચાઈલ્ડ વેલ્ફેરની ફોસ્ટર કૅરમાં રાખવાનો આદેશ આપ્યો.

એ દિવસ હતો ૨૩ સપ્ટેમ્બર, ૨૦૨૧ અને અરિહા હતી સાતેક મહિનાની. અરિહાને ફોસ્ટર કૅરમાં તો મોકલી દેવામાં આવી અને એ અધૂરું હોય એમ, અરિહાના ગુપ્તાંગમાં ઈજા બદલ એના પરિવાર સામે પોલીસફરિયાદ નોંધવામાં આવી. શાહદંપતીને ભારે આઘાત લાગ્યો. પછી પોલીસે એમને ચાઈલ્ડ વેલ્ફેરનો નિયમ સમજાવ્યો કે તમે અરિહાને અઠવાડિયે માત્ર એક વાર કલાક મળી શકશો. આગળ જતાં તો એ સમય પણ ઘટાડીને મહિને એક વાર કલાકની મુલાકાત કરી. અરિહાનો પાસપોર્ટ પણ એના પરિવાર પાસેથી લઈ લેવામાં આવ્યો.