આ ચેટજીપીટી તો બનશે વધુ જોખમી રમકડું!

ગૂગલિયા દાક્તર બનીને સેલ્ફ મેડિકેશન કરતા લોકોએ હવે ચેતી જવાની જરૂર છે.

- ડૉ. મિતાલી સમોવા

તમે જાણો છો કે વર્ષ ૧૯૯૦થી લઈને ૨૦૧૭ દરમિયાન માત્ર કિડની ફેઈલ્યૉરને કારણે યુવાનો તથા વૃદ્ધોના મૃત્યુદરમાં ૪૨ ટકા જેટલો ભયજનક અને તોતિંગ વધારો થયો છે? ગ્લોબલ મોર્ટાલિટી રેટ (સમગ્ર વિશ્વમાં નોંધાતા મૃત્યુદર)માં આ પ્રમાણ બહુ મોટું કહેવાય.

શું તમે એ જાણો છો કે ઍન્ટિબાયોટિક રેઝિસ્ટન્સ વર્ષેદહાડે ૧૩ લાખ લોકોનો ભોગ લે છે? ઍન્ટિબાયોટિક દવા આડેધડ પ્રમાણમાં લેવાને લીધે જતેદહાડે એની અસર ઓછી થતી જાય અને એક તબક્કો એવો આવે કે દવા કામ જ ન કરે, એને કહેવાય ઍન્ટિબાયોટિક રેઝિસ્ટન્સ. કોરોના કાળમાં આપણે જોયું કે ઘણા લોકો આપમેળે જ દવા લેતાં થઈ ગયા હતા. બે છીંક આવે તોય વાઈરસ વળગ્યો હોવાનું માની લઈ ડોલો જેવી હાથવગી ટેબ્લેટ અથવા કાઢો લેવાનું શરૂ કરી દેતા. આને કહેવાય સેલ્ફ મેડિકેશન. ડૉક્ટર ન હોય એ માણસ પણ ઝાઝું સમજ્યા વગર પોતાની જાતે જ જાણે ડૉક્ટર હોય એમ દવા લેવા માંડ!

હમણાં ચૅટજીપીટી નામની ઑનલાઈન આર્ટિફિશિયલ ઈન્ટેલિજન્સ સર્વિસને કારણે સેવાની ગુણવત્તા તથા માનવજીવન પરની એની સંભવિત અસર (અને આડઅસર પણ) પર વ્યાપક ચર્ચા ચાલી રહી છે. એમાં પણ એક મોટું ભયસ્થાન છે સેલ્ફ મેડિકેશનનું. કઈ રીતે? આવો, જાણીએ.