ભારતમાં સુપર રિચ ટૅક્સ?: સવાલ જ નથી!

અમેરિકા જેવો દેશ ભલે વિચારે કે લાગુ કરે, આપણા દેશમાં સુપર રિચ ટૅક્સ શા માટે લાગુ થવો જોઈએ નહીં, એનાં કારણ આ રહ્યાં..

- જયેશ ચિતલિયા

નિતેશ બુદ્ધદેવઃ ખરેખર સરકારની નજર તો છે..

ભારતની વસતિ ચીનથી પણ વધી જવાની છે.. આ જાણીને રાજી થવું કે નિરાશ? સારું થયું કે બૂરું થયું? એ ચર્ચાનો વિષય છે. દેશમાં મેનપાવર (માનવબળ) મહત્ત્વનું છે, પણ એમના જીવનધોરણની જવાબદારી પણ આવશ્યક છે. માત્ર વસતિ કે માનવબળ વધતું રહે અને એની સામે રોજગાર સમસ્યા, જાહેર સુવિધાઓનો અભાવ, આર્થિક અસમાનતા વધતાં રહે તો એ ન્યાયી કે વાજબી ન ગણાય.

આર્થિક સમાનતાની વાત

તો એક અલગ જ ચર્ચાનો વિષય છે. આપણો દેશ સામ્યવાદી નથી, હોવો પણ જોઈએ નહીં, મૂડીવાદી પણ નથી, હોવો પણ જોઈએ નહીં, સમાજવાદી પણ હોવો જોઈએ નહીં. આપણા દેશમાં સમાજવાદ અને મૂડીવાદનું વ્યવહારું સમતોલપણું હોવું જોઈએ. આજની ભાષામાં આપણે એને ઈન્ફ્લુઝિવનેસ (સર્વસમાવેશ) કહે છે અર્થાત્ દેશના વિકાસનો લાભ છેવટના માનવી સુધી પહોંચવો જ જોઈએ. માત્ર સીમિત વર્ગ જ લાભ મેળવતો રહે એ વિકાસની સારી કે સાચી સફળતા નથી.

આટલી લાંબી ભૂમિકા એ માટે જરૂરી છે કે તાજેતરમાં ફરી વાર સુપર રિચ ટૅક્સની વાતો ચર્ચામાં આવી છે. મોંઘવારી, ઊંચા વ્યાજદર અને બૅન્કોની ક્રાઈસિસ સહિતની આર્થિક કટોકટીનો તેમ જ સંભવિત રિસેશનનો સામનો કરી રહેલા અમેરિકામાં પણ હમણાં સુપર રિચ ટૅક્સની વાત થવા લાગી છે.