મ્યુઝિક થેરાપીથી ગુનાહિત માનસનું શુદ્ધીકરણ..

સંગીતસમ્રાટ તાનસેનના શરીરમાં રાગ દીપક ગાવાથી ઉત્પન્ન થયેલા દાહને તાના અને રીરીએ રાગ મલ્હાર ગાઈને શાંત કર્યો હતો, કંઈ એ જ રીતે નરસિંહનગરીની જેલના રીઢા કેદીનાં મનમાં અપરાધના અગ્નિને સંગીત દ્વારા ઠારવાનો અનોખો પ્રયોગ જૂનાગઢનો એક યુવાન કરી રહ્યો છે.

- ધીરુ પુરોહિત (જૂનાગઢ)

આશરે સાડા છ દાયકા પહેલાં વી.શાંતારામે એક ફિલ્મ બનાવેલીઃ

દો આંખે બારહ હાથ, જેમાં એક યુવાન જેલ-વૉર્ડન દ્વારા ખતરનાક અપરાધીઓને કાળકોટડીને બદલે ખુલ્લી જગ્યામાં (ઓપન જેલમાં)રાખી એમને સુધારવાના પ્રયોગની વાત હતી. એ માલિક તેરે બંદે હમ.. સૈયા જૂઠો કા બડા સરતાજ.. અને ઉમડઘુમડ કર આઈ રે ઘટા જેવાં એનાં ગીતો આજેય ઝૂમતાં કરી દે છે.

આવો જ કંઈ પ્રયોગ હમણાં જૂનાગઢમાં થઈ રહ્યો છે અને સંયોગથી પ્રયોગના અસબાબ ગીત-સંગીત જ છે. હા, અહીંનો એક નાગર યુવાન સંગીતથી કેદીના મનનો દાહ શાંત કરવા જઈ રહ્યો છે.

તાના-રીરી શબ્દ રાગ સાથે જોડાયેલો છે અને એનું જોડાણ જૂનાગઢ સાથે છે. ભક્તકવિ નરસિંહ મહેતાની દીકરી કુંવરબાઈની દીકરી શર્મિષ્ઠાની પુત્રીઓનાં નામ હતાં તાના અને રીરી. હવે નરસિંહનગરીનો યુવાન નયન વૈષ્ણવ આ તાના-રીરીને રાગ અને રોગના નિવારણનું માધ્યમ બનાવી રહ્યો છે. રાગને મન સાથે જોડી માધ્યમ બનાવી રહ્યો છે. રાગને મન સાથે જોડી બંદીવાન શરીરને અપરાધમુક્ત બનાવવાની એની પહેલને ગુજરાત હાઈ કોર્ટે રાજ્યવ્યાપી બનાવવા મંજૂરી આપી છે અને જૂનાગઢ જેલના કેદીઓથી જ આ પ્રયોગની શરૂઆત કરવા જણાવ્યું છે. ત્રીસી વટાવી ગયેલો નયન જૂનાગઢ ડિસ્ટ્રિક્ટ કોર્ટનો કર્મચારી છે.