ખાલિસ્તાનઃ ખાલી ચણો વાગે ઘણો કે પછી..

પંજાબમાં અમ્રીતપાલ સિંહના માધ્યમથી ખાલિસ્તાનની ચળવળ જોર પક્ડી રહી છે ત્યારે કેનેડા જેવા દેશમાં આ વિભાજનવાદી આંદોલનને મળી રહેલા પીઠબળને અવગણવા જેવું નથી. શું કહે છે કેનેડાના ભારતીયો..

- સમીર પાલેજા (મુંબઈ)

વ્યસનમુક્તિ નશામુક્તિની જનજાગૃતિ ઝુંબેશના નામે ખાલિસ્તાની અજગરને ફરી બેઠો કરી રહેલા શીખ યુવાન અમ્રીતપાલ સિંહની ચર્ચા-ઈન્ટરવ્યૂ મિડિયામાં ઠેર ઠેર ચમકી રહ્યાં છે. સાથે કેનેડા, ઑસ્ટ્રેલિયા, બ્રિટન જેવા દેશોમાં બેઠેલા ખાલિસ્તાની સમર્થકો ફરી સળવળી રહ્યા હોવાના સંકેત પણ છે.

કેનેડામાં ટોરન્ટોનાં મંદિરો પર ખાલિસ્તાની સૂત્રોચ્ચાર લખી દેવાની ઘટના પછી ઑસ્ટ્રેલિયામાં લક્ષ્મીનારાયણ મંદિર તથા ભારતીય રાજદૂતની કચેરી પર પણ ખાલિસ્તાનતરફી લખાણ ચીતરવામાં આવ્યું. અરે, વડા પ્રધાન નરેન્દ્ર મોદી વિશે અણછાજતી વાત પણ લખવામાં આવી. બ્રિટનમાં પાકિસ્તાની રૅલીમાં ખાલિસ્તાની સમર્થકો પણ શીખ ધર્મના ધ્વજ લઈને ભારત વિરોધી સૂત્રોચ્ચાર કરતા જોડાયા હતા. એ પહેલાં કેનેડા સહિત અમુક દેશોનાં ગુરુદ્વારાઓમાં ખાલિસ્તાન વિશે જનમત લેવાનાં નાટક થયાં હતાં. અહીં પ્રશ્ન થાય કે આવા દેશની સરકાર કેમ ખાલિસ્તાનીઓને મૂક ટેકો આપતી હશે?

કેનેડાના ઓટ્ટાવામાં રહેતા અને વૈદિક સંસ્કૃતિ તથા ગરવી ગુજરાત ઓટ્ટાવા નામે બે સેવાભાવી સંસ્થા ચલાવતા કશ્યપ દેસાઈ ચિત્રલેખાને કહે છે:

'કેનેડામાં અમુક ગુરુદ્વારામાં ખુલ્લેઆમ ખાલિસ્તાનની વાતો થાય છે. ખાલિસ્તાનને સીધો કે આડકતરો ટેકો આપતાં તત્ત્વો કેનેડાના રાજકારણમાં પણ છે. કેનેડિયન બ્રોડકાસ્ટિંગ કૉર્પોરેશન જેવી સરકારી સંસ્થા પણ વખતોવખત ખાલિસ્તાનના ટેકેદારો તથા ભારતવિરોધી તત્ત્વોને પ્લૅટફૉર્મ આપતી રહે છે.’

કશ્યપભાઈ ઉમેરે છે કે દર શૈક્ષણિક સત્રમાં ભારતથી દોઢેક લાખ વિદ્યાર્થી કેનેડામાં ઉચ્ચ શિક્ષણ માટે આવે છે, એમાં ગુજરાતી અને પંજાબી વિદ્યાર્થીઓનું પ્રમાણ મોટું છે. પંજાબના બધા નહીં તો બે-પાંચ ટકા સ્ટુડન્ટ્સ થોડાં વર્ષ અહીં રહે ત્યાં સુધીમાં ખાલિસ્તાનના કૉન્સેપ્ટમાં બ્રેન વૉશ થઈ જાય એવી શક્યતા રહે છે.

ભારતમાં કૃષિ કાયદાઓની વિરુદ્ધમાં જે દેખાવો થયા એમાં ખાલિસ્તાની તત્ત્વો સામેલ હતાં. એ જ રીતે કેનેડામાં ભારતના હાઈ કમિશન સામે કૃષિ કાયદાની વિરોધમાં થયેલા દેખાવોમાં પણ ખાલિસ્તાનતરફીઓનો હાથ હોવાની શંકા સ્થાનિક ગુજરાતીઓએ વ્યક્ત કરી છે.