ઈમ્પેક્ટ ફીની આ તે કેવી ઈમ્પેક્ટ?

એક ગેરકાયદે બાંધકામ તોડવામાં આવે તો સામે બે અનધિકૃત બાંધકામ ઊભાં થાય એવી હાલત છે.

- 

સ્માર્ટ સિટી અમદાવાદને ભલે ઘણી સિદ્ધિ મળી હોય, પણ આ શહેરમાં અંદાજે અઢી લાખ ગેરકાયદે ઈમારતો ખડકાઈ ગઈ છે. ગુજરાતમાં આઠ મહાનગરો અને સ્થાનિક તંત્રના અમુક ભ્રષ્ટ અધિકારીઓ તેમ જ અમુક નેતા, બિલ્ડરોની સાઠગાંઠના લીધે ગેરકાયદે બાંધકામોનો રાફડો ફાટ્યો છે એ સૌ જાણે છે. ઘણા નાગરિકોએ પણ સરકારી નિયમની પરવા કર્યા વિના મનફાવે એ રીતે ઘર, ઑફિસ, દુકાન, ગોડાઉન તથા અમુક કિસ્સામાં ધાર્મિક સ્થાનોમાં પણ ગેરકાયદે બાંધકામ કર્યાં છે. જાણી લો કે મહાપાલિકામાં ૪૨ ટકા તથા નગરપાલિકા અને સત્તામંડળોની હદમાં પચાસેક ટકા બાંધકામો બીયુ (બિલ્ડિંગ યુઝ) પરમિશન વિનાનાં છે. ક્યારેક સ્થાનિક પ્રશાસન ગેરકાયદે બાંધકામ કરનારાને નોટિસ આપી એવાં અમુક બાંધકામ તોડી પણ પાડે છે.