ગેરકાનૂની ડિજિટલ લોન ઍપ્સના દિવસો પૂરા

ફુગાવો-મોંઘવારી, વધતા વ્યાજદર, અર્થતંત્રનો વિકાસદર (જીડીપી) અને ડિજિટલ લૅન્ડિંગ ઍપ્સ (નાણાં ધિરાણ કરતી ઍપ્સ)ના નિયમન વિશે અને પરોક્ષપણે કંઈક અદાણી પ્રકરણ વિશે શું છે રિઝર્વ બૅન્કનો અભિગમ.

- જયેશ ચિતલિયા

સૌપ્રથમ ડિજિટલ લૅન્ડિંગ ઍપ્સની વાત કરીએ. કોઈ પણ લોન ઍપ્સ યા વેબસાઈટ મારફત નાણાં ધિરાણ આપવાની પ્રવૃત્તિ હવે પછી વધુ પારદર્શક અને સલામત બનવાની આશા જાગી છે. અત્યાર સુધી અનેક ગેરકાનૂની ઍપ્સ બધાને ધિરાણ માટે આકર્ષક ઑફરો કરી અનેક જરૂરતમંદ લોકોને ફસાવતી હોવાનું બહાર આવતું રહ્યું હતું.

આવી ઍપ્સ કોઈ પણ નિયમન હેઠળ નહીં હોવાથી એમની માટે આ કામ આસાન હતું, પણ હવે રિઝર્વ બૅન્કના એક જ કદમ મારફત નિયમન વિનાની બધી ધિરાણ ઍપ્સને ગેરકાનૂની ઠરાવીને આ ધિરાણ માહોલ ઘણેખરે અંશે સુરક્ષિત બનાવવામાં આવશે. બીજા શબ્દોમાં કહીએ તો રિઝર્વ બૅન્ક ટૂંકમાં જેન્યુઈનલૅન્ડિંગ ઍપ્સનું વ્હાઈટ લિસ્ટ બહાર પાડશે અર્થાત્ આ યાદીમાં જે ઍપ્સનાં નામ હશે, એમની પાસેથી ધિરાણ લેવામાં સલામતીની આશા રાખી શકાશે, કેમ કે આ યાદીમાં સ્થાન ધરાવતી ઍપ્સ બૅન્કિંગ રેગ્યુલેશનનું પાલન કરતી હશે.

ગેરકાનૂની લૅન્ડિંગ ઍપ્સ થશે બ્લૉક