ગુજરાતને G20 સમિટ ફળવાના ઓરતા

વૈશ્વિક વેપારમાં સિંહફાળો ધરાવતા વીસ દેશોના સમૂહની ગુજરાતમાં યોજાનારી ૧૫ બેઠકમાં રાજ્યને મળશે એનો પ્રગતિપથ દાખવવાની તક.

- 

G20 સમિટની પહેલી બેઠકનો ગુજરાતમાં થયો શુભારંભ.

ગુજરાતમાં દર વર્ષે પતંગ ઉત્સવ અને વાઈબ્રન્ટ બિઝનેસ સમિટમાં ભાગ લેવા ઘણા વિદેશીઓ આવે છે. પાછલાં વર્ષોમાં અહીંનું સ્થાપત્ય, હસ્તકળા, વગેરે જોવા તથા ઐતિહાસિક અને પુરાતત્ત્વશાસ્ત્રની દૃષ્ટિએ મહત્ત્વનાં સ્થળોની મુલાકાત લેવા પણ વિદેશીઓ આવતા થયા છે. અમદાવાદથી માંડી મોઢેરા, પાટણથી પોરબંદર અને કચ્છના રણ સુધી હવે વિદેશી મુલાકાતીઓ જોવા મળે છે. હમણાં તો એકસાથે ઘણા દેશના મુલાકાતી ગુજરાત આવી પહોંચ્યા.

એમની ગુજરાત મુલાકાતનો અવસર હતો G20 સમિટ.

G20 તરીકે ઓળખાતા ૨૦ દેશોના આ સમૂહમાં ભારત ઉપરાંત અમેરિકા, ચીન, રશિયા, જપાન, જર્મની, ફ્રાન્સ, બ્રિટન અને સાઉદી અરેબિયા સહિત વિકસિત અને વિકાસશીલ રાષ્ટ્રો જોડાયાં છે. ભારતે ગઈ પહેલી ડિસેમ્બરે ઈન્ડોનેશિયાથી આ સમૂહનું અધ્યક્ષપદ સંભાળીને પ્રથમ વાર G20ની યજમાની મેળવી. શુભારંભે વડા પ્રધાન નરેન્દ્ર મોદીએ મિટના લોગો અને વેબસાઈટનું અનાવરણ કર્યું. લોગોમાં પૃથ્વીને દેશના રાષ્ટ્રીય પુષ્પ કમળ સાથે જોડ્યું છે તથા ધ્યેય છે વસુધૈવ કુટુમ્બકમ્.