વિદેશ સુધી સંભળાઈ છે આ સફળ પ્રયાસની ત્રાડ

પર્યાવરણના પડકારો સામે જીવવૈવિધ્ય જાળવી રાખવાની જે કેટલીક પહેલ કરવામાં આવી, એમાં કૅપ્ટિવ બ્રીડિંગ અને એનિમલ એક્સચેન્જ પ્રોગ્રામ મોખરે છે. આ બન્ને કાર્યક્રમોમાં પ્રજાતિઓને જાળવી રાખવા માટે જુદાં જુદાં વાતાવરણમાં એમના પુનઃ વસવાટના પ્રયાસ થઈ રહ્યા છે.

- ધીરુ પુરોહિત (જૂનાગઢ)

જૂનાગઢ જાઓ તો સક્કરબાગ જરૂર જજો એવી સલાહ આપણને અવારનવાર આપવામાં આવે છે. આ સક્કરબાગ એટલે એશિયાનું સૌથી જૂનું પ્રાણી સંગ્રહાલય. સક્કરબાગ ઝૂની અનેક વિશિષ્ટતા છે, જેમાં ટોચ પર છેઃ અહીંના એશિયાઈ સિંહો, જેમના માટે આ ઘરનું ઘર છે.

એક સમયે દુર્લભ બની ગયેલા એશિયાઈ સિંહોની પ્રજાતિને વિસ્તરવાવિકસવા માટે આ ઝૂએ નવી ફળદ્રુપ ભૂમિ પૂરી પાડી છે. એક સદી પહેલાં ગીરનાં જંગલોમાં સિંહોની સંખ્યા માત્ર બે આંકડામાં રહી ગઈ હતી, પણ સુવ્યવસ્થિત સંવર્ધન પગલાંના પરિણામે ગીર અને આસપાસના વિસ્તારોમાં સિંહોની સંખ્યા સતત વધી છે, જે અત્યારે તો ૬૭૦ના આંકને વટાવી ગઈ છે. વિશ્વભરમાં વાઈલ્ડલાઈફ કન્ઝર્વેશનના સફળ દાખલા આપતી વખતે એશિયાઈ સિંહોના ગીરમાં થયેલા સંરક્ષણનો ખાસ અભ્યાસ કરવામાં આવે છે. આ સફળતાના પાયામાં છે સક્કરબાગ ઝૂ. અત્યારે આ પ્રાણીબાગ એશિયાઈ સિંહોનું એકમાત્ર બ્રીડિંગ સેન્ટર છે.

નાર (વરુ) અને ગીધ સહિતના જીવોના ‘કૅપ્ટિવ બ્રીડિંગ પ્રોગ્રામ'ને ખાસ્સી સફળતા મળી છે.

૧૮૬૩માં શરૂ થયેલા જૂનાગઢ સક્કરબાગ ઝૂની એશિયાઈ સિંહોના લીધે એક આગવી ઓળખ ઊભી થઈ છે. છેલ્લા પાંચ દાયકામાં એનિમલ એક્સચેન્જ પ્રોગ્રામ હેઠળ અહીંથી દેશ-વિદેશનાં પ્રાણી સંગ્રહાલયમાં ર૦૦થી વધુ એશિયાઈ સિંહો મોકલવામાં આવ્યા છે, જેના લીધે ભારતના ચોથા નંબરના સૌથી મોટા સક્કરબાગનું નામ વિશ્વભરમાં ગુંજતું થયું છે.

સક્કરબાગ ઝૂના રેન્જ ફોરેસ્ટ ઑફિસર (આરએફઓ) નીરવ મકવાણા ચિત્રલેખાને જણાવે છેઃ ‘આંગળીના વેઢે ગણાય એટલી ઓછી સંખ્યામાં વન્યપ્રાણીઓને સાચવી, વૈજ્ઞાનિક દેખરેખમાં એમને ઉછેરીને એમની સંખ્યા વધારવામાં આ ઝૂ સફળ રહ્યું છે. ગીરના સિંહો ઉપરાંત બીજાં વન્યપ્રાણીઓનો પણ કાળજીપૂર્વકનો ઉછેર આ ઝૂની વિશેષતા છે. એ રીતે જોતાં એનિમલ એક્સચેન્જ અને કૅપ્ટિવ બ્રીડિંગ, એ બન્ને ઉપક્રમમાં સક્કરબાગે નામના મેળવી છે.’

શું છે એનિમલ એક્સચેન્જ પ્રોગ્રામ અને કૅપ્ટિવ બ્રીડિંગ?