ચીની અજગર આટલો આક્રમક કેમ બન્યો છે?

ડોકલામ, લડાખ અને હવે અરુણાચલ પ્રદેશના તવાંગ વિસ્તારની સરહદે ઘૂસણખોરીનો પ્રયાસ કરી ચીને કોઈ ચોક્કસ સંકેત આપવા માંડ્યા છે? હજી સુધી પોતે જેને સ્વીકૃતિ આપી નથી એવા સીમાડે ચીન આખરે કરવા શું ધારે છે?

- હીરેન મહેતા

મોકો મળે ત્યાં અને ત્યારે ચીની સૈનિકો ઝંડા લઈને આવી જાય અને એ જમીન પર પોતાનો દાવો ઠોકી બેસાડે.

પાકિસ્તાન પર ભરોસો મૂકીને આપણે કારગિલ યુદ્ધમાં ભેરવાયા એ વખતે તત્કાલીન સંરક્ષણપ્રધાન જ્યોર્જ ફર્નાન્ડીસે દેશને ચેતવેલોઃ પાકિસ્તાન તો મગતરું છે, આપણને ખરો ખતરો તો ચીન તરફથી છે.

એ વખતે ઘણા સુરક્ષા નિષ્ણાતોએ ફર્નાન્ડીસની ભવિષ્યવેત્તા તરીકે મજાક ઉડાવેલી. ૧૯૬૨ પછી ચીને ક્યારેય આપણા સીમાડે કંઈ ઊંધુંચતું કર્યું નહોતું. વળી, કારગિલ યુદ્ધનાં થોડાં વર્ષ અગાઉ જ ભારત અને ચીન વચ્ચે એકમેકની સેના સામસામે બંદૂક તથા સ્ફોટક પદાર્થનો ઉપયોગ નહીં કરે..થી માંડી અનેક મુદ્દે સહમતી સાધવામાં આવી હતી. બન્ને દેશ વચ્ચે વિશ્વાસનું વાતાવરણ આકાર લે એ માટેના કૉન્ફિડન્સ બિલ્ડિંગ મેઝર્સનો એ ભાગ હતો. આ જ કારણે કેટલાક રાજનીતિજ્ઞોએ ફર્નાન્ડીસના નિવેદનને બાલિશ ગણાવ્યું હતું.