આપણે ફક્ત વચન પર નભનારી પ્રજા છીએ?

ચૂંટણી આવે એટલે વગર ચોમાસે વાયદાઓનો વરસાદ શરૂ થઈ જાય. પ્રચાર વખતે ઉમેદવારો મતદારોને આંબા-આમલી દેખાડે, પણ એ વચનપૂર્તિ કરવાનું આવે તો એના ખર્ચનું શું? એની ગણતરી પણ માંડવાનો સમય હવે આવી ગયો છે.

- હીરેન મહેતા

ચૂંટણીપ્રચારમાં ઉચ્ચારવામાં આવતા વાયદા આપણને કેટલામાં પડે છે?

લોકસભા, ૩૧ રાજ્યોની વિધાનસભા અને કેટલાંક રાજ્ય કરતાં વધુ મોટું બજેટ ધરાવતાં મુંબઈ કે દિલ્હી જેવાં શહેરોની મહાપાલિકાને ગણતરીમાં લઈએ તો ચોમાસા સિવાયના દિવસોમાં દેશમાં કોઈ ને કોઈ ખૂણે ચૂંટણી થતી રહે છે. હમણાં ગુજરાત અને હિમાચલ પ્રદેશની વિધાનસભાની ચૂંટણી ગઈ. દિલ્હી મહાપાલિકા અને કેટલાંક રાજ્યોની છૂટીછવાયી બેઠકો પર પણ મતદાન થયું. આવતા વર્ષે કર્ણાટક અને મેઘાલયનાગાલૅન્ડ-ત્રિપુરા, બિહાર, તેલંગણ, ઓડિશા, વગેરે રાજ્યોની ચૂંટણી છે તો એ પછી લોકસભા માટે ગાજાંવાજાં શરૂ થઈ જશે.

મતદારોને રીઝવવાના હોય એટલે દરેક રાજકીય પક્ષ અને અપક્ષ ઉમેદવારો સુદ્ધાં વચનોના કોથળા ખુલ્લા મૂકી દે. ચૂંટણીના દિવસોમાં કોઈ રાજકારણી એ નહીં વિચારતો હોય કે ધારો કે ખરેખર એના કે એના પક્ષના હાથમાં સત્તા આવી તો પોતે જે વચનોની ભરમાર કરી છે એ પૂર્ણ કરવાનું શક્ય છે કે નહીં અને શક્ય હોય તો પણ એની પાછળ જે ખર્ચ થશે એ રકમ આવશે ક્યાંથી?