કાઠિયાવાડનો મતદાર કોના ઈવીએમમાં ભૂલો પડશે?

પહેલા તબક્કાના મતદાન માટે સૌરાષ્ટ્ર-દક્ષિણ ગુજરાત તૈયાર થઈ રહ્યાં છે ત્યારે જાણો, ઉમેદવારોની પસંદગીમાં પડદા પાછળ કેવા ભજવાયા ખેલ?

- કેતન ત્રિવેદી (અમદાવાદ)

ઉમેદવારોનાં નામોની જાહેરાતને મુદ્દે સર્જાતી ઉત્સુકતા, કોણ કપાયા-કોણ સચવાયાની ચર્ચા, કપાયેલા ઉમેદવારોની નારાજગી અને પક્ષમાંથી સામૂહિક રાજીનામાં, પક્ષના કાર્યાલય પર નારાજ નેતાજીના સમર્થનમાં કાર્યકરોનાં ધાડાં, અમુક બેઠક પર કોણ ઉમેદવાર હશે એને લઈને છેક છેલ્લી ઘડી સુધીની કશમકશ, દિલ્હી-અમદાવાદ વચ્ચે નેતાઓની આવન-જાવન અને જાતજાતનાં નિવેદન..

આમ તો દરેક ચૂંટણીમાં આ પ્રકારનો જ રાજકીય માહોલ સર્જાતો હોય છે અને આ વખતે ૨૦૨૨ની ગુજરાત વિધાનસભાની ચૂંટણીમાં પણ મંગળવાર, ૧૫ નવેમ્બર, ૨૦૨૨ની સવારે આ લખાઈ રહ્યું છે ત્યારે ગુજરાતમાં આ જ માહોલ દેખાઈ રહ્યો છે. બન્ને મુખ્ય રાજકીય પક્ષ ભાજપ અને કોંગ્રેસે એના મોટા ભાગના ઉમેદવારોની યાદી બહાર પાડી દીધી છે. ત્રીજા રાજકીય પરિબળ તરીકે ઊભરીને આવેલી આમ આદમી પાર્ટીના ઉમેદવારોનાં નામની જાહેરાત તો ઘણી વહેલી થઈ ચૂકી છે અને એક ડિસેમ્બરના રોજ યોજાનારા પહેલા તબક્કાના મતદાન માટેનાં ઉમેદવારી પત્રો તો ભરાઈ પણ ચૂક્યાં છે. આ અંક તમારા હાથમાં હશે ત્યારે પાંચ ડિસેમ્બરે થનારા બીજા તબક્કાના મતદાન માટે ઉમેદવારોનું ચિત્ર પણ સ્પષ્ટ થઈ ચૂક્યું હશે.

હૈ તૈયાર હમ.. ચૂંટણી સાંગોપાંચ પાર પડે એ માટે ઈલેક્શન કમિશને તકેદારી લેવા માંડી છે તો અર્ધલશ્કરી દળના જવાનો ‘સબ સલામત’ની ખાતરી આપવા ફરી રહ્યા છે.

ભાજપ, કોંગ્રેસ અને આપ એ ત્રણેય પક્ષના પ્રચાર વિશે તો આપણે અગાઉ વાત કરી ચૂક્યા છીએ. આમ પણ આ વખતે ઉમેદવારી ફૉર્મ ભરવા અને મતદાનના દિવસ વચ્ચે સમયગાળો ખૂબ ઓછો છે એટલે ઉમેદવારો માટેય રાત થોડી ને વેશ ઝાઝા એવી સ્થિતિ છે. આ બધાની વચ્ચે ગુજરાતની આ વખતની ચૂંટણીનું અત્યાર સુધીમાં જે ચિત્ર ઊપસે છે એ સમજીએ.