એ હાલો પરકમ્મા કરવા..

ગિરનાર ફરતેની ૩૬ કિલોમીટરની ગાઢ જંગલ, નદી-પહાડો અને સાવજોની વસતિ વચ્ચેથી પસાર થતી યાત્રા માણસે એક વાર તો કરવી જ રહી.

- 

કાઠિયાવાડમાં એને પરકમ્મા કહે છે. આ પરકમ્મા એટલે પરિક્રમા.. ગિરનારની પરિક્રમા.. પ્રકૃતિની પરિક્રમા. આ પરકમ્મા કરવા ફક્ત સૌરાષ્ટ્ર જ નહીં, પૂરા ભારતમાંથી લાખો લોકો જૂનાગઢની ગિરી તળેટીએ આવે છે. કારતક સુદ અગિયારસ એટલે કે દિવાળી પછીના અગિયારમા દિવસે શરૂ થતી આ પરિક્રમા ગાઢ જંગલ વચ્ચેથી પસાર થઈ ગિરનાર તળેટીમાં પાછી ફરે છે. જંગલમાં ચાર રાત્રિરોકાણ પગપાળા સાથે પાંચ દિવસની ગરવા ગિરનાર ફરતેની આ યાત્રા લોકો માટે જિંદગીનું યાદગાર સંભારણું બની જાય છે.

ચોમાસું પૂરું થયું હોય, પણ હજી વહેતાં ઝરણાંઓનાં સૌંદર્ય વચ્ચે પ્રકૃતિ સોળે કળાએ ખીલી હોય એ સમયની આ યાત્રાના અલગ અલગ પડાવોમાં દેખાતી ભાતીગળ સંસ્કૃતિ.. અલગ અલગ પહેરવેશ.. જુદી જુદી ભાષા.. ભજનડાયરાઓની રમઝટ અને અન્નક્ષેત્રમાં પીરસવામાં આવતી ગરમ રસોઈનો સોડમદાર સ્વાદ એક અલગ જ માહોલ ઊભો કરી દે છે.

ક્યાંક નદી-ઝરણાં વચ્ચેથી વાટ શોધવાની તો ક્યારેક વનરાજને જોવાની તક ઝડપી લેવાની.