નૅશનલ ગેમ્સ પછી ગુજરાતમાં આવે છે ડિફેન્સ એક્સ્પો

દશેરા એટલે શસ્ત્રની પૂજાનો દિવસ અને દિવાળીમાં થાય આતશબાજી. આ બે પર્વની વચ્ચે ગુજરાતમાં યોજાઈ રહ્યો છે અસ્ત્ર-શસ્ત્રનો મહોત્સવ. સાથે હશે લડાકુ વિમાનો અને હેલિકૉપ્ટર્સના હેરતઅંગેજ કરતબ તથા રોશની રેલાવતો ડ્રોન શો.

- મહેશ શાહ (અમદાવાદ)

અમદાવાદનો સાબરમતી રિવરફ્રન્ટ જાણીતું પિકનિક સ્પૉટ છે. હજી અ હમણાં જ અહીં ૩૬મી નૅશનલ ગેમ્સની અમુક સ્પર્ધા યોજાઈ. હવે યોજાશે ડિફેન્સ એક્સ્પો. સામ્યતા ગણો તો ગુજરાતમાં નૅશનલ ગેમ્સ પ્રથમ વાર યોજાઈ એમ ડિફેન્સ એક્સ્પો માટે પણ પહેલી વાર ગુજરાત યજમાન બન્યું છે.

પાટનગર ગાંધીનગર અને અમદાવાદમાં ૧૮થી ૨૨ ઑક્ટોબર સુધી બારમો DefExpo-2022 અર્થાત્ ડિફેન્સ એક્સ્પો-૨૦૨૨ યોજાવાનો છે, એની તડામાર તૈયારી થઈ રહી છે. મૂળ યોજના પ્રમાણે તો આ વર્ષની શરૂઆતમાં (૧૦થી ૧૪ માર્ચ સુધી) ગાંધીનગર અને અમદાવાદમાં ડિફેન્સ એક્સ્પો યોજાવાનો હતો. એ માટે ૬૩ દેશોના ૧૨૧ પ્રતિનિધિઓ સહિત ૯૭૩ પ્રદર્શકોની નોંધણી પણ થઈ ગઈ હતી, પરંતુ રશિયા-યુક્રેન વચ્ચેના યુદ્ધને કારણે એક્સ્પો મુલતવી રાખવો પડ્યો. હવે દિવાળી ટાણે આ એક્સ્પોનું આયોજન થઈ રહ્યું છે ત્યારે પ્રદર્શકો અને એક્સ્પોમાં ભાગ લેનારા પ્રતિનિધિઓની સંખ્યા વધીને ૧૧૩૦ સુધી પહોંચી ગઈ છે!

સહેજ જાણી લો કે દેશમાં સૌપ્રથમ ડિફેન્સ એક્સ્પો વર્ષ ૧૯૮૧માં દિલ્હીના પ્રગતિ મેદાનમાં યોજાયો હતો. સંરક્ષણ વિભાગના એક ઉચ્ચ અધિકારી ચિત્રલેખાને કહે છે: ‘છેલ્લો (અગિયારમો) ડિફેન્સ એક્સ્પો ઉત્તર પ્રદેશના લખનઉમાં વર્ષ ૨૦૨૦ દરમિયાન યોજાયો હતો, એમાં ૧૭૨ વિદેશી મિલિટરી કંપનીઓ સહિત ૮૫૬ ભારતીય ડિફેન્સ કંપનીએ ભાગ લીધો હતો.’