તોતિંગ તોડકામ, તોતિંગ પડકાર

ઉત્કર્ષ મહેતાઃ વિસ્ફોટકથી બાંધકામ તોડી પાડવાની ટેક્નોલૉજીમાં ભારત હજી પાછળ છે.

- 

નોઈડાના આ ટ્વિન ટાવરને જમીનભેગા કરનારી મુંબઈની એડિફિસ એન્જિનિયરિંગ કંપનીના બન્ને પાર્ટનર ઉત્કર્ષ મહેતા અને જિગર છેડા સતત છ મહિનાથી ઝીણવટપૂર્વકનું પ્લાનિંગ કરી રહ્યા હતા. ૨૦૧૧માં એડિફિસ શરૂ કરીને અનેક ઈમારત, બ્રિજ, મૉલ-મલ્ટિપ્લેક્સ, પાણીના વિશાળ ટાંકા, ઈન્ડસ્ટ્રિયલ ગાળા, પ્લાન્ટ, વગેરેનાં ડિમોલિશનમાં અગ્રેસર બની જનારા મિકેનિકલ એન્જિનિયર ઉત્કર્ષ મહેતાએ નોઈડાથી ચિત્રલેખાને આખા પ્રોજેક્ટ વિશે અથથી ઈતિ સુધીની માહિતી આપી, જે એમના જ શબ્દોમાં જાણીએ...

અમે ઑક્ટોબર, ૨૦૨૧માં સાઈટ વિઝિટ કરેલી. ચાર કંપનીઓએ તોડકામ માટે બીડ કરેલી. સુપ્રીમ કોર્ટે નીમેલા કન્સલ્ટન્ટે અનેક માપદંડો પારખીને અમારી કંપનીને પસંદ કરી, જેને નોઈડા ઑથોરિટીએ પણ સંમતિ આપી. જાન્યુઆરી, ૨૨માં સુપરટેક કંપની સાથે અમે કૉન્ટ્રાક્ટ સાઈન કર્યો, જે ૧૭.૫૦ કરોડ રૂપિયાનો હતો, એમાંથી ૪.૩૦ કરોડ રૂપિયા બિલ્ડરે (સુપરટેક કંપનીએ) અમને ચૂકવવાના હતા. બાકીની રકમ અમારે કાટમાળમાં વેરાયેલા સ્ટીલ વેચીને વસૂલવાની છે.