મહામારીની સાઈડ ઈફેક્ટ સેટિંગ કલ્ચરનો આડેધડ વિકાસ

ગયા અઠવાડિયે યુનિવર્સિટી ઑફ ગ્રાન્ટ કમિશને વીસથી વધુ એવી યુનિવર્સિટીની એક યાદી બહાર પાડી, જે ફેક છે. કારકિર્દીના પાયા સમાં વિદ્યાધામ જ બનાવટી, ઠગાઈવાળાં એ તે કેવું? લૉકડાઉનમાં ફલેલી ને ફાલેલી ફેક જૉબ ઈન્ટરવ્યૂથી લઈને ફેક કર્મચારી જેવી ગોબાચારી ક્યાં જઈને અટકશે એ કહેવું મુશ્કેલ છે.

- કેતન મિસ્ત્રી (મુંબઈ)

ઈન્સ્ટન્ટ મેસેજિંગ સર્વિસ આપતી મોબાઈલ ઈ ઍપ નામે વ્હૉટ્સઍપ પર ફૉરવર્ડ જોક્સના હુમલા શરૂ થયા એ દિવસોમાં એક ટુચકો મોબાઈલમાં વારંવાર અફળાતો. રાકેશ-સ્મિતા ચૅટ કરી રહ્યાં હતાં. રાકેશના દરેક સવાલનો જવાબ સ્મિતા ઈમોજીથી જ આપતી. રાકેશ કંટાળ્યો. એણે સવાલ કર્યો:

રાકેશઃ સાંભળ્યું છે કે તું ઈંગ્લિશમાં ફેલ થઈ?

સ્મિતા (ગુસ્સાના ઈમોજી સાથે): વ્હૉટ આર યુ ટાસ્કિંગ? હુ ટેલ્ડ યુ? ઈટ ઈઝ અનપોસિબલ... આઈ વેન્ટ ટુ સો રિજલ્ટ ટુમારો... આઈ પાસ્ડ અવે.

રાકેશઃ એક કામ કર સ્મિતા, આપણે સ્માઈલીથી જ ચૅટ કરીએ.

સ્મિતાઃ ઓકે. ગોડ બ્લાસ્ટ યુ.

થોડા સમય પહેલાં ઈન્ટરનૅશનલ ઈંગ્લિશ લૅન્ગ્વેજ ટેસ્ટિંગ સિસ્ટમ (આઈઈએલટીએસ)માં ગોલમાલ કરીને કેનેડા પહોંચી ત્યાંથી અમેરિકામાં ગેરકાયદે ઘૂસવા માટે પકડાયેલા વિદ્યાર્થીઓ વિશેનો કેસ વાંચીને આ જૂની જોક યાદ આવી ગઈ. કેનેડા-અમેરિકાની સરહદે વહેતી સૅન્ટ રેજિસ રિવર વાટે આ વિદ્યાર્થીઓ અમેરિકામાં (ગેરકાયદે) ઘૂસી રહ્યા હતા ત્યારે બોટ ઊંધી વળી ગઈ. જો કે એમને બચાવી લેવામાં આવ્યા.

અંગ્રેજી ભાષા પર કેવો ને કેટલો કાબૂ છે એની કસોટી કરતી અને કડક આંતરરાષ્ટ્રીય ધોરણ મુજબ લેવામાં આવતી લેખિત-મૌખિક આઈલેટ્સ એક્ઝામમાં ગોલમાલ કરવા બદલ અમેરિકામાં પકડાયેલા વિદ્યાર્થીના અન્ય કિસ્સામાં જ્યારે એમને અમેરિકાની કોર્ટમાં રજૂ કરવામાં આવ્યા ત્યારે એ એક વાક્ય અંગ્રેજીમાં બોલી શકતા નહોતા. એમને ફૉર્મમાં પોતાના શિક્ષણ વિશે વિગત લખવાનું કહેવામાં આવ્યું તો એમણે લખ્યું:

baar pass અને colej. કંટાળીને જજે એમને હિંદી ટ્રાન્સ્લેટર આપવાની ભલામણ કરી. તાજેતરમાં જ સમાચાર આવ્યા કે યુનિવર્સિટી ઑફ ગ્રાન્ટ કમિશને ૨૧ જેટલી વિદ્યાપીઠોને બની બેઠેલી અથવા સ્વઘોષિત (સેલ્ફ સ્ટાઈલ્ડ) અને ફેક એટલે કે નકલી જાહેર કરી. યુનિવર્સિટીની વેબસાઈટ (ugc.ac.in) પર આખું લિસ્ટ જોઈ શકાય છે. યુજીસીએ ચોખ્ખા શબ્દોમાં કહ્યું છે કે ઍગ્રિકલ્ચર ઍન્ડ ટેક્નોલૉજી અને શિક્ષા પરિષદ અને આધ્યાત્મિક જેવાં છોગાં ધરાવતી આ ખયાલી વિદ્યાપીઠોને ડિગ્રી આપવાની સત્તા નથી. સંભાળજો.