સાંભળો જી, આવે છે - 5G

વીસમી સદીના અંતિમ દાયકામાં ઈન્ટરનેટના આગમને દુનિયા બદલી નાખી. ૨૧મી સદીના આરંભે મોબાઈલ ફોનમાં ઈન્ટરનેટની સુવિધા આવી. વિશ્વને સાંકળતા આ બળવાન માધ્યમને 3G અને 4G ટેક્નોલૉજીએ ઝડપી બનાવી. એ બે કરતાં અનેક ગણી ઝડપી 5G ટેક્નોલૉજી હવે વિશ્વના ઘણા દેશોમાં કાર્યરત છે ત્યારે ભારત પણ આગામી દિવસોમાં 5G ટેક્નોલૉજીને ચાર હાથે અપનાવવા જઈ રહ્યું છે. કેવી રીતે બદલશે 5G આપણી દુનિયા?

- સમીર પાલેજા (મુંબઈ) ।નિતુલ ગજ્જર (વડોદરા)

ભણતરથી માંડીને કામધંધા સુધી બધું જ આજે ઈન્ટરનેટ થકી સરળ બન્યું છે. હવે તો ઈલેક્ટ્રોનિક ઉપકરણોનાં સંચાલનમાં પણ ઈન્ટરનેટની જરૂર પડે છે. આઠેક વર્ષ અગાઉ દોઢ ગિગાબાઈટ્સ ઈન્ટરનેટમાં આપણો આખો મહિનો નીકળી જતો, જ્યારે આજે એટલું જ ઈન્ટરનેટ આપણને દિવસભર માટે પણ ઓછું પડે છે. આવનારા સમયમાં ઈન્ટરનેટનો ઉપયોગ હજી વધશે, કારણ કે ટૂંક સમયમાં ભારતમાં પણ 5G ઈન્ટરનેટ કનેક્શન આવી રહ્યું છે.

૨૬ જુલાઈએ ભારતમાં ૭૨ ગિગાહર્ટ્ઝ જેટલા સ્પેક્ટ્રમનું લિલામ થવાનું છે, જેની મૂળ કિંમત ૪.૩ લાખ કરોડ રૂપિયા છે. રિલાયન્સ ગ્રુપની જિઓ ઉપરાંત વોડાફોન-આઈડિયા અને ભારતી ઍરટેલ એમાં બીડર્સ છે. અદાણી ગ્રુપે પણ પ્રાઈવેટ નેટવર્ક અને ઈન્ફ્રા પ્રોજેક્ટ્સ માટે 5G લાઈસન્સ મેળવવા બીડ કરી છે.

સાદી ભાષામાં કહીએ તો 5G નેટવર્ક એટલે આપણે હાલ જેટલી સ્પીડનું ઈન્ટરનેટ વાપરીએ છીએ એના કરતાં આશરે ૧૦ ગણી વધુ ઝડપી ઈન્ટરનેટ સર્વિસ! ધારો કે અત્યારે આપણને એક ગિગાબાઈટ્સ ડેટા ડાઉનલોડ કરવામાં અંદાજે પાંચ મિનિટ થાય છે, પણ 5G કનેક્શનમાં આ ડાઉનલોડ પાંચ સેકન્ડથી ઓછા સમયમાં થશે. ઈન્ટરનેટના સતત વધતા વપરાશને પહોંચી વળવા ઝડપી અને સક્ષમ ઈન્ટરનેટ કનેક્શન આપવું જરૂરી છે. સાથે જ ઈન્ટરનેટને વપરાશકર્તા સુધી પહોંચાડતી સુવિધા અર્થાત્ નેટવર્ક સારું હોય તો જ આપણાં ઘર-ઑફિસ, વગેરેમાં ઈન્ટરનેટ બરાબર ચાલે છે.

એક રીતે જોવા જાવ તો ઈન્ટરનેટ એ અમર્યાદિત રીતે વહેતી ગંગા હોવાથી એ કોઈ દિવસ ખૂટી પડશે એવી બીક નથી, પરંતુ ઈન્ટરનેટને વપરાશકર્તા સુધી પહોંચાડવું એ ખરી ચૅલેન્જ છે. જો કે એના પણ વિવિધ કીમિયા શોધાયા છે અને દિવસે દિવસે વિકસિત થઈ રહ્યા છે. આપણે એને જનરેશન કહીએ છીએ, જેમ કે 1G, 2G, 3G, 4G અને હવે 5G.