કભી જો બાદલ બરસે..

થોડાં વર્ષ પહેલાં ચોમાસા દરમિયાન લોકો ફરવા જવાનું ટાળતા. કારણ? તો કહે, વરસાદ સાથે આવતી હાલાકી! જો કે એવા ટાઈમમાં પણ કેટલાક ઘુમક્કડો બૅક-પૅક લઈને નીકળી પડતા. હવે તો એવા મસ્તમિજાજીઓનું પ્રમાણ વધ્યું છે અને બાકાયદા મોન્સૂન ટુરિઝમ શરૂ થયું છે. ચાલો, જાણીએ એવી જાણીતી-અજાણી જગ્યા વિશે, જે મોન્સૂનમાં મ્હોરી ઊઠે છે.

- અલ્પા નિર્મલ (મુંબઈ)

દુનિયામાં બે પ્રકારના લોકો હોય છે, પહેલા લોકો એ, જેમને ઘરઑફિસની બારીમાંથી વરસતો વરસાદ જોવા માત્રથી કાદવ-કીચડ, પાણી ભરાવાની, ટ્રાફિક જામની સમસ્યા, માખી-મચ્છરના ઉપદ્રવ વધવાની ચિંતા થાય છે. બીજા લોકો એવા છે, જે મેહુલિયાનું નામ સાંભળીને પણ ભીના-ભીના થઈ જાય છે. આવા લોકો દર બીજા-ત્રીજા વીકએન્ડે અલગ અલગ જગ્યાએ જઈ વરસાદની મજા લેવાના પ્લાન કરે છે. ક્યારેક દરિયે તો ક્યારેક ડુંગરે, કદી અડાબીડ જંગલોમાં તો કદી ધમધમાટ ધોધની નીચે. એક દિવસ, બે દિવસ, અઠવાડિયું ને કોઈક તો વળી દસ-દસ દિવસના પ્રોગ્રામ સુદ્ધાં કરે છે. જગ્યા કેટલીય દૂર હોય, સગવડો પણ સામાન્ય હોય.. બસ, ત્યાં વરસાદ અસાધારણ હોવો જોઈએ.

વેલ, આજે ઊપડીએ કેટલાંક મહારાષ્ટ્ર-ગુજરાતનાં એવાં સ્થળોએ જ્યાંનું ચોમાસું અસામાન્ય છે તો એનું પ્રવાસન તરબતર કરી દે એવું શક્તિશાળી છે. શરૂઆત કરીએ ઘાટોના પ્રદેશ મહારાષ્ટ્રથી. દહાણુથી લઈ સિંધુદુર્ગ સુધીની દરિયાઈ પટ્ટી અને સહ્યાદ્રિ પર્વતની ઊંચી-નીચી હારમાળાએ આ રાજ્યને અનોખી સુંદરતા બક્ષી છે. ખાસ કરીને જૂન મધ્યથી સપ્ટેમ્બર સુધીના મહિનામાં મહારાષ્ટ્ર ખીલી ઊઠે છે. આમ તો અહીં ચાલીસથી વધુ બીચ છે, પણ ગુહાગરનો દરિયાકિનારો અપ્રતિમ. નારિયેળી અને આંબાનાં વૃક્ષોથી ભરચક કાંઠો એ ગુહાગર.

સફેદ માટી અને અરબી સમુદ્રનું ચોખ્ખું વારિ કોંકણના આ તટને અનોખું સ્થાન અપાવે છે. ચોમાસામાં અહીં વહેતી વિશષ્ઠ નદી પણ હૃષ્ટપુષ્ટ થઈને દરિયામાં સમાઈ જાય છે. મુંબઈથી રત્નાગિરિ ટ્રેન અને ત્યાંથી બાય રોડ ચિપલુણ જતાં ગુહાગર પહોંચી શકાય. અહીં રહેવાની મિડિયમ કક્ષાની સુવિધા છે, પણ અહીં મળતો નારિયેળનો ગરમાગરમ સૂપ એકદમ જક્કાસ. વરસતા વરસાદમાં, દરિયાનાં પાણીમાં પગ પખાળતાં, નારિયેળના દૂધમાં જાતજાતનાં શાકભાજી નાખેલા સૂપની ચૂસકી સહેલાણીના મેમરી કાર્ડમાં સેવ થઈ જશે.

ગુહાગર ઉપરાંત મહારાષ્ટ્રમાં ગણપતિપુળે, તારકર્લી, હરિહરેશ્વર, શ્રીવર્ધન, કાશિદ પણ પ્રખ્યાત દરિયાકિનારા છે. ગોવા સુધી લાંબા ન થવું હોય તો મુંબઈથી બેથી ત્રણ દિવસ ફરવા જવાના આ મસ્ત વિકલ્પ છે.