મે, ૧૯૭૪માં ઈન્દિરા ગાંધીની સરકાર વખતે ભારતે પહેલવહેલો અણુધડાકો કર્યો ત્યારે અને મે, ૧૯૯૮માં અટલ બિહારી વાજપેયીના શાસનકાળમાં એના બીજા પરીક્ષણ સાથે ભારતે પોતાને ન્યુક્લિયર સ્ટેટ, અણુહથિયારોથી સજજ રાષ્ટ્ર જાહેર કર્યું ત્યારે વિશ્વના તમામ દેશો ધૂંવાંપૂવાં થઈ ગયા હતા. અમેરિકા, કેનેડા, જપાન સહિતના દેશોએ ભારત સાથે ઘણેઅંશે આર્થિક સંબંધો કાપી દીધા હતા અને તમામ આર્થિક મદદ અટકાવી દીધી હતી. જો કે દાયકાની સશક્ત ડિપ્લોમસી પછી ૨૦૦૮માં મનમોહન સિંહની સરકારના કાર્યકાળ સુધીમાં ધીમે ધીમે ભારત પરથી તમામ પ્રતિબંધ દૂર થયા અને દુનિયાએ ભારતનો અણુહથિયારથી સજ્જ રાષ્ટ્ર તરીકે સ્વીકાર કરવો પડ્યો. મનમોહન સિંહે પણ અમેરિકા સાથેની ભારતની ૨૦૦૮ની અણુસંધિને એમના કાર્યકાળની ટોચની ઉપલબ્ધિ ગણાવી હતી.

આ વાત એ કારણે યાદ કરવી પડે કે ફરી એક વાર એવા વ્યાપક પ્રતિબંધોનો ભય ભારત પર તોળાઈ રહ્યો છે. રશિયા-યુક્રેન યુદ્ધને કારણે વિશ્વ બે ભાગમાં વહેંચાઈ રહ્યું છે ત્યારે હિંદુસ્તાને જપાની જૂતાં, ઈગ્લિશસ્તાની પાટલૂન સાથે માથા પર લાલ રુસી ટોપી પહેરેલી રાખી છે એટલે કે તટસ્થતા જાળવી રાખી છે એ કારણે ગિન્નાયેલા અમેરિકાએ ભારતને પાઠ ભણાવવા પ્રતિબંધોની ધમકી આપી છે.

‘સુખોઈ-૩૦’ પ્રકારનાં ર૦૦થી વધુ યુદ્ધવિમાનો ઉપરાંત ભારતે રશિયા પાસેથી ઍરક્રાફ્ટ કૅરિયર 'વિક્રમાદિત્ય’ પણ મેળવ્યું છે તો 'બ્રહ્મોસ' જેવી સુપરસોનિક ક્રૂઝ મિસાઈલ બન્ને દેશે સાથે મળીને વિકસાવી છે.