ડૉ. આશા ગોહિલ: ગૌદાનથી આવી રહી છે આદિવાસી આત્મનિર્ભરતા..

‘દીકરી ને ગાય દોરે ત્યાં જાય’ એ જાણીતી ઉક્તિ છે, પણ આજે વાત કરવી છે એવી દીકરીની, જે ગાયને જ્યાં દોરી જાય છે ત્યાં અનેક કુટુંબનું ભરણપોષણ થાય છે. પ્રાચીન કાળમાં દરેક અવસરે ગૌદાનનું મહત્ત્વ હતું. આ પરંપરા આમ તો અસ્તાચળે છે, પણ વલસાડનાં એક ગૌપ્રેમી મહિલા પ્રોફેસરે ગૌદાનની પ્રથાને આદિવાસી વિસ્તારોમાં જીવંત રાખી છે.

- અરવિંદ ગોંડલિયા

આશાબહેન, મને એક ગાય જોઈતી છે.. લઘરવઘર કપડાં પહેરેલા પાતળા બાંધાના આશરે ૫૦ વર્ષના માણસે ઈચ્છા જાહેર કરી. એના ચહેરા પર મજબૂરી સ્પષ્ટ હતી, પણ મહેનતથી જીવનનિર્વાહ કરવાની ઈચ્છા પણ કળાતી હતી. ગાય મળે તો એના મરણ સુધી સાચવણી કરવાની ખાતરી પણ એણે આપી.