સરકાર ચડી ચકરાવે.. ગ્રાહકો ને વેપારી થયા પરેશાન ઘઉંની આવી તે કેવી મોકાણ?

આ સીઝનમાં ખેતરે ઘઉં પાક્યા એવા જ ખુલ્લા બજારમાં ઊંચા દામ મળવા લાગતાં ભારતના ખેડૂતોને બગાસું ખાતાં પતાસું આવ્યું એવો લાભ થયો. ભારે ગરમીને કારણે ઘઉંનું ઉત્પાદન ઘટવાની સામે ઢગલામોઢે નિકાસ થવા લાગતાં ભાવમાં તેજી આવી હતી. ૩૫થી વધુ દેશોમાં ઘઉંની નિકાસ કરીને વૈશ્વિક માર્કેટ પર કબજો જમાવવાના પ્રયાસથી જો કે દેશમાં જ ઘઉંની અછત સર્જાશે એવો અંદેશો મળતાં જ ભારત સરકારે રાતોરાત ઘઉંની નિકાસ પર નિયંત્રણો મૂકી દીધાં. ઓચિંતાની આ નિકાસબંધીને કારણે વેપારીઓ-નિકાસકારો જંગી ખોટના ખાડામાં ઊતરી ગયા, પણ મોંઘવારીની આગથી પરેશાન ગ્રાહકોને કદાચ ઘઉંનો વધુ ભાવવધારો જોવો નહીં પડે.

- મયૂર મહેતા (મુંબઈ)

દુનિયાની માર્કેટમાં આજે કોઈ કૉમોડિટીની સૌથી વધારે ડિમાન્ડ હોય તો એ ઘઉં છે. અમેરિકા-યુરોપ ઉપરાંત આફ્રિકા-એશિયાના મોટા ભાગના દેશોમાં બ્રેડ અને અન્ય વાનગી રૂપે ઘઉં ખૂબ ખવાય છે. ઘઉં ઠંડા પ્રદેશનો પાક છે, પણ આ વરસે દેશ-દુનિયામાં રેકૉર્ડ બ્રેક ગરમી પડી એટલે ઘઉંનું ઉત્પાદન ઓછું થયું.