ક કૃષ્ણનો ક... અ અર્જુનનો અ.. ગ ગીતાનો ગ...

૧૮ અધ્યાય અને ૭૦૦ શ્લોક ધરાવતી ‘ભગવદ્ગીતા’ને દુનિયાનો શ્રેષ્ઠ મૅનેજમેન્ટ ગ્રંથ માનવામાં આવે છે. પાંચ હજાર વર્ષ પૂર્વે સ્વયં ભગવાન શ્રીકૃષ્ણના મુખેથી કુરુક્ષેત્રની રણભૂમિમાં અર્જુનને સમજાવવામાં આવેલું આ તત્ત્વજ્ઞાન જેમ વાંચો-જાણો-પચાવતાં જાવ એમ એની અગાધતા-ઊંડાણના નવા આયામ અનુભવવા મળે. આ સમયાતીત જ્ઞાનગંગાથી બાળમાનસને તરબોળ કરવા માટે ગુજરાત અને કર્ણાટક સરકારે ભગવદ્ગીતાને શાળાના અભ્યાસક્રમમાં દાખલ કરવાની જાહેરાત કરી છે ત્યારે બિનસાંપ્રદાયિકતાના નામે વિરોધના સૂર પણ ઊઠ્યા છે.

- જવલંત છાયા (રાજકોટ) સમીર પાલેજા (મુંબઈ)

'તું કેટલામાં અધ્યાયે પહોંચ્યો?'

'બસ, જો બારમો પૂરો થશે..'

'ઓહો..! ભક્તિયોગ સુધી પહોંચી ગયો? તો તો વિશ્વરૂપ દર્શન પણ આવી ગયું કાં?'

‘હા, પણ એમાં કંઈ મોઢે રહેતું નથી. શ્લોક ને શબ્દો અઘરા છે..'

‘ભાઈ, આ કવિતા નથી કે ગોખી લેવાય. અહીં તો મૂળ તત્ત્વજ્ઞાન સમજીએ તો બધું યાદ રહી જાય..'