വീണ്ടും ചില ആമ്പൽ വിശേഷങ്ങൾ

ചെറിയ ചട്ടിയിലും വലിയ ചട്ടിയിലും വലിയ ജലാശയത്തിലും പരിപാലിക്കാവുന്ന ഇനങ്ങൾ

- ജേക്കബ് വർഗീസ് കുന്തറ

അലങ്കാരപ്പൊയ്കയ്ക്കു ചന്തം ചാർത്തുന്ന ജലസസ്യങ്ങളിൽ മുന്നിൽ ആമ്പൽ തന്നെ. ദൂരെ നിന്നുപോലും നോട്ടം കിട്ടുന്ന വിധത്തിൽ വെള്ളത്തിനു മുകളിൽ തലയെടുപ്പോടെ വിരിഞ്ഞു നിൽക്കുന്ന വിവിധ വർണങ്ങളിലും വലുപ്പത്തിലുമുള്ള പൂക്കൾ, കാലവ്യത്യാസമില്ലാതെ പൂവിടുന്ന പ്രകൃതം, ജലപ്പരപ്പിനോടു പറ്റി പരന്നു കിടക്കുന്ന ഇലകൾ എന്നിവയെല്ലാം ആമ്പലിനെ മറ്റ് അലങ്കാര ജല സസ്യങ്ങളിൽനിന്ന് വേറിട്ടുനിർത്തുന്നു. ചെറിയ ചട്ടിയിലും വലിയ ജലാശയത്തിലും ഒരുപോലെ പരിപാലിക്കാവുന്ന ഇനങ്ങൾ ഇതിനെ കൂടുതൽ ജനപ്രിയമാക്കുന്നു.

പകൽ പൂവ് വിരിയുന്ന ട്രോപ്പിക്കൽ, ഹാർഡി, ഓസ്ട്രേലിയൻ ഇനങ്ങളാണ് നമ്മുടെ നാട്ടിലെ ഉഷ്ണമേഖലാ കാലാവസ്ഥയിൽ പൊയ്കയിൽ വളർത്താൻ നന്ന്. ഇവയിൽ ഓസ്ട്രേലിയൻ ഇനങ്ങൾ ഈയിടെയാണ് ന മ്മുടെ നാട്ടിലെത്തിയത്. ഒട്ടേറെ ഇതളുകളുമായി കപ്പിന്റെ ആകൃതിയിൽ സവിശേഷ നിറത്തിലുള്ള പൂക്കൾ ഇവയ്ക്കു വേറിട്ട ഭംഗി നൽകുന്നു. ജലസ്, ന്യൂ ഓർലാൻസ് ലേഡി, റ്ററന്റുല (Tarantula) എല്ലാം ഇവയിലെ നൂതന ഇനങ്ങൾ. ട്രോപ്പിക്കൽ വർഗത്തിലെ സാസിമോൻ തോൻ, പൂവഡോൾ, ഗാലക്സി, കിങ് ഓഫ് സിയാം, പ്ലംസി,കരോൺചനോക് എന്നിവ മുന്തിയ സങ്കര ഇനങ്ങളാണ്. ഇവയെല്ലാം കാലവ്യത്യാസമില്ലാതെ ആണ്ടുവട്ടം പൂവിടുന്നു. പല ട്രോപ്പിക്കൽ ഇനങ്ങളുടെയും ഇലകളിൽ പച്ച നിറത്തിനൊപ്പമുള്ള തവിട്ടു നിറം ചെടിയെ കൂടുതൽ ആകർഷകമാക്കുന്നു. 100 രൂപ മുതൽ 40000 രൂപ വരെ വിലയുള്ള ചെടികൾ വിപണിയിൽ ഉണ്ട്.