പ്രിയമേറുന്ന പ്രീമിയം തത്തകൾ

ഒന്നരക്കോടിയോളം വരും ദിനേശ് ഏവിയറിയിലെ അരുമകളുടെ മൂല്യം

- 

ബഡ്ജീസും ഫിഞ്ചുകളും ആഫ്രിക്കൻ ലവ് ബേർഡ്സും കൊക്കറ്റിലും കൊന്യൂറുകളും കൊക്കാറ്റുവുമെല്ലാം ചേർന്ന് സമ്പന്നമാണ് നമ്മുടെ അലങ്കാരപ്പക്ഷി വിപണി. ഇടക്കാലത്തൊന്നു തളർന്നെങ്കിലും ശക്തമായി തിരിച്ചു വരികയാണ് പെറ്റ്സ് വിപണി.

കോവിഡ് കാലത്ത് വെറുതെയിരുന്നപ്പോൾ ആളുകൾ ആവേശത്തോടെ അരുമകളെ വാങ്ങിക്കൂട്ടിയിരുന്നു. അന്നത്തെ വിപണി കണ്ട് ലാഭക്കൊതിയോടെ ചില ബ്രീഡർമാരും കച്ചവടക്കാരും നടത്തിയ കടുംവെട്ടാണ് വിപണിയെ ദുർബലമാക്കിയത്. എണ്ണം പെരുകിയതോടെ വിലയിടിഞ്ഞു. “പാഷൻ' ഇല്ലാതെ പണം മാത്രം ലക്ഷ്യമിട്ടവർ വൈകാതെ പിൻവലിയുകയും ചെയ്തു. എന്നാൽ, കോവിഡ് കാലത്തും തളരാതെ പറന്ന പ്രീമിയം അലങ്കാര പക്ഷിയിനങ്ങളുണ്ട്. മക്കാവും ലോറീസും ലോറിക്കീറ്റുകളും. അന്നും ഇന്നും എന്നും ഇവയുടെ നിലയും വിലയും വിപ ണിയും തിളക്കമാർന്നുതന്നെ നിൽക്കുകയാണെന്നു പറയുന്നു, തമിഴ്നാട്ടിലെ മേട്ടുപ്പാളയത്തുള്ള അരുമപ്പക്ഷി പ്രേമി ദിനേശ്കുമാർ.

കിളിക്കൂട്ടുകാർ

കംപ്യൂട്ടർ സയൻസിൽ എൻജിനീയറിങ് ബിരുദധാരിയായ ദിനേശ് തിരുപ്പൂരിൽ ഗാർമെന്റ് വ്യവസായമേഖലയിലെ പ്രമുഖ കയറ്റുമതി സംരംഭകരിലൊരാളാണ്. ബാല്യത്തിൽ ബഡ്ജീസിനെ വളർത്തിക്കൊണ്ടു തുടങ്ങിയതാണ് പക്ഷി സ്നേഹമെന്ന് ദിനേശ്. പിന്നീടത് വിലയും മൂല്യവുമേറിയ ഇനങ്ങളിലേക്കു തിരിഞ്ഞു. അന്നൊന്നും ബിസിനസ് സംരംഭം എന്ന നിലയിൽ ചിന്തിച്ചിട്ടേ ഇല്ലെന്ന് ദിനേശ്.

ഗാർമെന്റ് രംഗത്ത് സജീവമാകുകയും തിരുപ്പൂരിൽ താമസിക്കുകയും ചെയ്ത കാലത്ത് വീടിന്റെ ടെറസിൽ അരുമപ്പക്ഷികൾക്കും കൂടൊരുക്കി. വിവാഹം കഴിച്ചപ്പോൾ ഭാര്യ കവിതക്കുമുണ്ട് അലങ്കാരപ്പക്ഷികളോട് ഇഷ്ടവും ആവേശവും.

തിരുപ്പൂരിൽ നിന്നു മടങ്ങി സ്വദേശമായ മേട്ടുപ്പാളയത്തു വീടു വയ്ക്കുമ്പോൾ കവിതയാണ് പക്ഷി വളർത്തൽ ഒരു സംരംഭമാക്കിയാലോ എന്നു പറയുന്നത്. അതോടെ വീടിനോടു ചേർന്ന് അതിവിശാലമായ ഏവിയറി തന്നെ നിർമിച്ചു ദിനേശ്കുമാർ. അപൂർവവും അതിമനോഹരവുമായ പ്രീമിയം അലങ്കാരപ്പക്ഷികളുടെ ലോകമാണിന്ന് നീലഗിരിക്കുന്നുകളുടെ താഴ്വരയിലുള്ള ദിനേശ് ഏവിയറി.