ഒരുങ്ങാം, വരൾച്ചയെ ചെറുക്കാം

കുറഞ്ഞ സമയത്തിനുള്ളിൽ കൂടുതൽ പെയ്യുന്ന കനത്ത മഴ അവസരമാക്കി പരമാവധി ജലം മണ്ണിലിറക്കുകയോ സംഭരണികളിൽ ശേഖരിക്കുകയോ വേണം

- ഡോ. മനോജ് പി. സാമുവൽ

ഇടമുറിയാതെ മഴ പെയ്യുന്ന ഇടവപ്പാതി ഇന്നു പഴ കഥ. മഴ ഇന്നു കൂടുതൽ കേന്ദ്രീകൃതവും തീവ്രതയേറിയതുമാണ്. മേഘവിസ്ഫോടനങ്ങൾ വാർത്തയാകാത്ത കാലം. മഴദിനങ്ങളുടെ എണ്ണം കുറയുകയും പെയ്യുന്ന ദിവസങ്ങളിൽ മഴ കനക്കുകയും ചെയ്യുന്നു. 2016 ലെ വരൾച്ചയോടെ കേരളത്തിൽ കാലാവസ്ഥമാറ്റം കൂടുതൽ അനുഭവപ്പെട്ടുതുടങ്ങി. 2018 ലും 2019 ലും തീവ്ര വെള്ളപ്പൊക്കം കണ്ടറിഞ്ഞു. ഇക്കൊല്ലം മഴയുടെ വിതരണക്രമവും അളവും പിന്നെയും മാറുകയാണ്.

ജൂൺ മുതൽ സെപ്റ്റംബർവരെ നീളുന്ന ഇടവ പാതിക്കാലത്തു സാധാരണ ചെയ്തിരുന്ന മഴയുടെ 57 ശതമാനം മാത്രമേ ഇതേവരെ (സെപ്റ്റംബർ 15) പെയ്തൊഴിഞ്ഞുള്ളൂ. അണക്കെട്ടുകൾ ഏറെയുള്ള പാലക്കാട്, ഇടുക്കി, തൃശൂർ, വയനാട് തുടങ്ങി 6 ജില്ലകളിൽ 50 ശതമാനത്തിനും മുകളിലാണ് മഴക്കുറവ്. ഒപ്പം, അന്തരീക്ഷ താപനിലയിലുള്ള വർധന ജലസംഭ രണികളിലെയും ഉപരിതല ജലസ്രോതസ്സുകളിലെയും ബാഷ്പീകരണത്തോത് ഉയർത്തുന്നു. തന്മൂലം സംഭരിച്ച ജലത്തിന്റെ അളവിലും കുറവുണ്ടാകുന്നു. മഴ ഇടവിട്ടു മാത്രം പെയ്യുന്നത് ഭൂമിക്കടിയിലേക്കു ജലം ആഴ്ന്നിറ ങ്ങുന്ന പ്രക്രിയ സാവധാനത്തിലാക്കുന്നു. ഇത് നമ്മുടെ കുളങ്ങളിലെയും കിണറുകളിലെയും ജലനിരപ്പ് താഴാൻ ഇടയാക്കുന്നു.