ഫാം ഫ്രഷ് പച്ചക്കറിക്കായി 10 മിനിറ്റും 2 അടി സ്ഥലവും

ഫ്ലാറ്റിനുള്ളിൽ പച്ചക്കറിക്കൃഷിക്ക് പുതുരീതിയുമായി സ്റ്റാർട്ടപ്

- 

പത്താം നിലയിലെ അപ്പാർട്മെന്റിൽ ജീവിക്കുന്നവർക്കും ആഗ്രഹമുണ്ടാവില്ലേ ഇത്തിരി പച്ചപ്പും പൂക്കളും വിഷമില്ലാ പച്ചക്കറിയുമൊക്കെ സ്വന്തമായി വേണമെന്ന്? അവരെ സഹായിക്കുകയാണ് ഹെയ് ഫാർമർ എന്ന അഗ്രി സ്റ്റാർട്ടപ്പിലൂടെ ജെറിൻ ജെ. മാത്യു, ക്രിസ്റ്റീൻ ജോ റെജി, ശരത് കൃഷ്ണ, തേജസ് കൃഷ്ണ എന്നീ യുവസംരംഭകർ. കളമശ്ശേരിയിലെ കൊച്ചിൻ യൂണിവേഴ്സിറ്റി ക്യാംപസിനു തൊട്ടു ചേർന്നു പ്രവർത്തിക്കുന്ന "ഹേ ഫാർമർ, ഹാർവാർഡ് യൂണിവേഴ്സിറ്റിയുടെ സോഷ്യൽ ഇന്നവേഷൻ പഠനങ്ങളുടെ ഭാഗമായി ഇവരെ തിരഞ്ഞെടുത്തിട്ടുണ്ട്.

കോയമ്പത്തൂർ ആർവിഎസ് കോളജിലും തിരുവനന്തപുരം എൻജിനിയറിങ് കോളജിലും പഠനം പൂർത്തിയാക്കിയവരാണ് ടീമംഗങ്ങൾ. സാധാരണ മട്ടുപ്പാവുകൃഷിയിലെന്ന പോലെ മണ്ണും ചാണകപ്പൊടിയുമൊക്കെ ഫ്ലാറ്റിനുള്ളിലേക്കു കൊണ്ടുവരാൻ പറ്റില്ല. അതുകൊണ്ടുതന്നെ എയ്റോപോണിക്സ് സാങ്കേതികവിദ്യയിലൂടെ വിളകൾ വളർത്തുന്ന മാതൃകയാണ് ഇവർ രൂപകൽപന ചെയ്തത്. പരിമിതമായ തോതിൽ ജലവും പോഷകങ്ങളും നൽകിയാൽ മതിയെന്നതിനാൽ അകത്തളങ്ങൾക്ക് ഏറെ യോജ്യം. ചീര, പാലക്, ലെറ്റ്യൂസ്, ബോക്ചോയ് തുടങ്ങിയ ഇലവർഗ പച്ചക്കറികൾ കൂടാതെ മുളക്, തക്കാളി, സ്ട്രോബെറി, സ്റ്റീവിയ, തൈം എന്നിവയൊക്കെ ഈ രീതിയിൽ ഉൽപാദിപ്പിക്കാം.