ഒത്തിരി പറമ്പല്ല മെച്ചം ഇത്തിരി വീട്ടുവളപ്പാണ്

 കൃഷിക്കു പ്രചോദനവും വഴികാട്ടിയും കർഷകശീയെന്നു ലെനു പീറ്റർ

- 

ജോലിയെക്കാളേറെ വരുമാനം കൃഷി നൽകുന്നുണ്ടെന്ന് ഒരു കോളജ് അധ്യാപകൻ പറഞ്ഞാൽ നിങ്ങൾ വിശ്വസിക്കുമോ? കാപ്പിയും കുരുമുളകും വിളയുന്ന 2.75 ഏക്കറിൽ നിന്നു കിട്ടുന്നതിലേറെ വരുമാനം 20 സെന്റ് വീട്ടുവളപ്പിൽ നിന്നുണ്ടെന്നു കൂടി കേട്ടാലോ? ഇക്കാര്യങ്ങൾ നേരിട്ടു ബോധ്യപ്പെടണമെങ്കിൽ കോട്ടയം ജില്ലയിലെ കുട്ടിക്കാനത്തെക്കു പോന്നോളൂ.

എംബിസി കോളജിൽ ജോലി നേടി കുട്ടിക്കാനത്തെത്തിയപ്പോൾ തന്നെ പത്തനംതിട്ടക്കാരൻ ലെനു പീറ്ററിന്റെ മോഹമായിരുന്നു അവിടെ ഒരു വീട്. ലെനുവിന്റെ സ്വർഗരാജ്യം. ഏതാനും വർഷങ്ങൾക്കുള്ളിൽ കോളജിനോടു ചേർന്ന് സ്ഥലം വാങ്ങി. ഒട്ടും ഉൽപാദനക്ഷമമല്ലാതെ ഉപേക്ഷിക്കപ്പെട്ട കാപ്പിത്തോട്ടം. രൂക്ഷമായ ജലക്ഷാമം മൂലം ആദായകരമായ കൃഷി സാധ്യമല്ലാത്ത ചരിവുഭൂമി.

എന്നാൽ ചെറുപ്പം മുതൽ കൃഷി ഹരമായ ലെനുവിന് അതൊന്നും പ്രശ്നമായില്ല. കാൽ നൂറ്റാണ്ടായി കർഷകശ്രീയുടെ സ്ഥിരം വായനക്കാരനായ അദ്ദേഹത്തിന് അതുവരെ വായിച്ചറിഞ്ഞതെല്ലാം നടപ്പാക്കാനുള്ള ഇടമായിരുന്നു അത്. സ്ഥലം ഏറ്റെടുത്തയുടൻ പടുതക്കുളം തയാറാക്കി. മഴവെള്ളസംഭരണമായിരുന്നു ലക്ഷ്യം. മഴക്കാലത്ത് കുളത്തിൽ വെള്ളം നിറച്ച അദ്ദേഹം കൃഷിയിടത്തിലുടനീളം കുരുമുളകു കൃഷിക്കായി സിൽവർ ഓക്ക് മരങ്ങൾ നട്ടുവളർത്തി. 280 താങ്ങുകാലുകളിൽ കുരുമുളക് പടർത്തിയതിനു പിന്നാലെ വീടും നിർമിച്ചു.