ലോകം മാറ്റുമോ ചാറ്റ്ജിപിടി ?

മനുഷ്യനേക്കാൾ സ്മാർട് ഗൂഗിളിന്റെ അന്തകൻ... അത്ര മിടുക്കുണ്ടോ ചാറ്റ്ജിപിടി എന്ന ചാറ്റ് ബോട്ടിന് 

- രതീഷ് ആർ. മേനോൻ ടെക്, സോഷ്യൽ മീഡിയ വിദഗ്ധൻ

ലോക പ്രശസ്ത ബിസിനസ് സ്കൂളായ അമേരിക്കയിലെ വാർട്ടൺ സ്കൂൾ അടുത്തിടെ ഒരു പരീക്ഷ നടത്തി. വിദ്യാർഥികൾക്കു വേണ്ടിയല്ല, ചാറ്റ്ജിപിടി (ChatGPT) എന്ന നിർമിത ബുദ്ധിയുടെ (ആർട്ടിഫിഷൽ ഇന്റലിജൻസ്, എഐ) കഴിവു പരിശോധിക്കുന്നതിനു വേണ്ടിയായിരുന്നു ഈ സ്‌പെഷൽ ഫൈനൽ എക്സാം. സാധാരണ പരീക്ഷയുടെ മാതൃകയിൽ പ്രത്യേകം തയാറാക്കിയ ചോദ്യങ്ങൾക്ക് അരമണിക്കൂർ കൊണ്ടുതന്നെ ചാറ്റ്ജിപിടി ഉത്തരമെഴുതി. ഫലം പരിശോധിച്ച വാർട്ടൺ പ്രഫസർ ക്രിസ്ത്യൻ ടെർവിഷിന്റെ കണ്ണുതള്ളി. ഉത്തരങ്ങളെല്ലാം ശരിയാണെന്നു മാത്രമല്ല, വിശദീകരണങ്ങളും ഉദാഹരണങ്ങളും അതിമനോഹരം.

പരിശോധനയ്ക്കു ശേഷം പ്രഫസർ ടെർവിഷ് പറഞ്ഞത് ഇങ്ങനെ, "ഞാൻ ചാറ്റ് ജിപിടിയുമായി പ്രണയത്തിലായിരിക്കുന്നു. ചാറ്റ്ജിപിടിയുടെ സ്കോർ A+ ഗ്രേഡ് നൽകാവുന്നത് എന്നു കൂടി കേൾക്കുമ്പോഴാണ് മനുഷ്യനും നിർമിതബുദ്ധിയും തമ്മിലുള്ള വ്യത്യാസം ബോധ്യപ്പെടുന്നത്. എന്താണ് ചാറ്റ്ജിപിടി എന്നല്ലേ. ഇതാ കേട്ടോളൂ.

എന്താണ് ചാറ്റ് ബോട്ട് ?

ഓൺലൈനിൽ ഉപയോക്താക്കളുമായി ചാറ്റ് ചെയ്യാനും അന്വേഷണങ്ങളിൽ സഹായിക്കാനും രൂപപ്പെടുത്തുന്ന പ്രോഗ്രാമുകളാണു ചാറ്റ് ബോട്ടുകൾ, കംപ്യൂട്ടറിലെയും ഫോണിലെയും ഡിസ്പ്ലേയുടെ മൂലയിൽ രസമുള്ള ഇമോജിയോടെ "സഹായം ആവശ്യമുണ്ടോ എന്നു ചോദിക്കുന്ന പോപ് അപ് കാണാറില്ലേ, അതൊക്കെ ചാറ്റ് ബോട്ടാണ്.

ഈ ഓട്ടോമേറ്റഡ് പ്രോഗ്രാമുകൾ മനുഷ്യരെപ്പോലെ ഉപ യോക്താക്കളുമായി ഇടപഴകുകയും ചോദ്യങ്ങൾക്കു മറുപടി നൽകുകയും ചെയ്യും. ആമസോൺ അലക്സ്, ആപ്പിൾ സിരി തുടങ്ങിയവ വ്യാപകമായി ഉപയോഗിക്കുന്ന ചാറ്റ് ബോട്ടുകളാണ്. ഇതുപോലൊരു ചാറ്റ് ബോട്ടാണു ചാറ്റ്ജിപിടി (ചാറ്റ് ജനറേറ്റീവ് പീട്രെയിൻഡ് ട്രാൻസ്ഫോർമർ).

എന്താണ് ചാറ്റ്ജിപിടി ?