எங்கள் வீட்டில் ஒருவராக வாழும் இசை!

சங்கீதத்தை மூச்சாகக் கொண்ட குடும்பத்தில் பிறந்தவரும், பிரபல நடனக்கலைஞர்களுடன் இணைந்து செயல்பட்டுக்கொண்டிருப்பவரும், இந்தியா மற்றும் வெளிநாடுகளில் நிகழ்ச்சிகளை சிறப்பாக நடத்தி வருபவரும், Finance Management- ல் மேற்படிப்பு படித்தவரும், சங்கீதத்துடன் வயலினையும் கற்று, இரண்டையும் திறமையாக கையாண்டு வருபவருமாகிய இசைக் கலைஞர் திருமதி அம்ரிதா முரளி பெண்மணிக்காக அளித்த பேட்டி:

- -ஆர்.மீனலதா, மும்பை

தங்களது பிறந்த ஊர், பெற்றோர் மற்றும் குடும்ப விபரங்கள்?

சென்னையில் பிறந்து வளர்ந்தவள் நான் பி.எஸ். செகண்டரி ஸ்கூலில் பள்ளிப் படிப்பை முடித்து, எத்திராஜ் கல்லூரியில் பட்டப்படிப்பை படித்து, முதுகலைப் பட்டத்தை லயோலா கல்லூரியில் பெற்றேன். எங்கள் குடும்பத்தில், சங்கீதம் எப்போதும் ஒலித்துக் கொண்டிருக்கும். என் இரண்டு பாட்டிகளும் நன்றாகப் பாடுவார்கள். தாய்வழிப் பாட்டி திருமதி சங்கரி (ராஜம் நாகராஜன்) ஆல் இந்தியா ரேடியோவில் கிரேடட் (graded) ஆர்டிஸ்ட்டாக இருந்தார் எனது சகோதரர் மற்றும் கசின்ஸ் என எல்லோருமே சங்கீதம், வயலின் அல்லது மிருதங்கம் வாசிப்பதில் பயிற்சி பெற்றவர்கள். எங்கள் குடும்பத்தில் ஒருவராக, இசை வாழ்ந்தது.

எந்த வயதில் இசை மற்றும் வயலின் பயின்றீர்கள்?

ஒன்பதாவது வயதில், தாய்வழிப் பாட்டி திருமதி சங்கரி நாகராஜனிடமிருந்து இசையைப் பயின்றேன். வயலினை, விட்டல் ராமமூர்த்தி சாரிடம் கற்றேன். என்னுடைய பெற்றோர்கள், குறிப்பாக தாயார், எனது இசைப் பயணத்திற்கு முதுகெலும்பு போல விளங்கினார், எப்போதும் ஊக்கமளிப்பதுடன், சங்கீதத்தின் மீது எனக்கிருந்த பற்றை வளர்த்தார். அரங்கேற்றம் என முறையாக நடக்கவில்லை எஸ்.வி. கிருஷ்ணன் மாமாவின் வற்புறுத்தலின் பேரில் 1997 ஆம் ஆண்டு “நாத இன்பம்“ அமைப்பில் வாசித்தேன். குன்னக்குடி பாலமுரளி கிருஷ்ணாவின் நிகழ்வு விடிஎஸ் ஆர்ட்ஸ் அகாடமியில் நடைபெறுகையில், அவருக்கு பக்க வாத்தியமாக வயலினை முதல் முறையாக இசைத்தேன். இவ்விரண்டு நிகழ்வுகளும் மனதில் நீங்காமல் இருப்பவைகளெனலாம்.

குருக்கள் குறித்த விபரங்கள்..?

தாய் வழி பாட்டியாகிய திருமதி சங்கரி நாகராஜன் தான் எனது முதல் குரு எனலாம். ஆரம்ப சங்கீதத்திற்கு அடித்தளம் அமைத்தவர். பின்னர் அநேக சிறந்த குருக்களிடமிருந்து பயிற்சி பெற்றது என்னுடைய இசைப் பயணத்தை அழகாக வடிவமைக்க உதவியது நான் செய்த பாக்கியம்.