உள்ளூராட்சி சபைகளில் பெண்களும் ஆட்சி அதிகாரமும்

அரசியலில் பெண்களின் பங்கேற்பு குறித்து அரசியல் ஆய்வாளர், ஊடக விரிவுரையாளர் அ . நிக்ஸன் கருத்து தெரிவிக்கையில்

- 

உள்ளூராட்சி சபைகளில் பெண்களின் பிரதிநிதித்துவம் அதிகரிக்கப்பட வேண்டும் எனக் கூறினாலும் தேர்தல்களில் போட்டி யிடும் பெண்களின் எண்ணிக்கை மிகவும் குறைவு.

போட்டியிட்ட பெண்களும் வெற்றி பெறுவதில்லை. இந்த அடிப்படையில் நோக்கினால் 2025 ஆம் ஆண்டு நடைபெற்ற உள்ளூராட்சி தேர்தலில் பெண்கள் போட்டியிட்டாலும் வெற்றிபெற்ற எண்ணிக்கை விகிதாசார அடிப்படையில் மிகவும் குறைவாகவே உள்ளன.

பாலின சமத்துவம், சமூக மேம்பாடு மற்றும் ஜனநாயகத்தை வலுப்படுத்த பெண்களின் பிரதிநிதித்துவம் அதிகளவில் இருக்க வேண்டும் என 2012 ஆம் ஆண்டு தீர்மானிக்கப்பட்டிருந்தது.

இலங்கை பாராளுமன்றத்தில் பெண்களின் பிரதிநிதித்துவம் 5.8% ஆகவும் மாகாண சபைகளில் 0% ஆகவும் உள்ளூர் அதிகார சபைகளில் 1.9% ஆகவும் உள்ளன. 2012ஆம் ஆண்டு உள்ளூராட்சிச் சபை மட்டத்தில் அறிமுகம் செய்யப்பட்டு, 2017ஆம் ஆண்டு திருத்தப்பட்ட புதிய கலப்புத் தேர்தல் முறையின் கீழ் நடைபெற்ற முதலாவது தேர்தலாக 2018 ஆம் ஆண்டு நடைபெற்ற உள்ளூராட்சி சபைத் தேர்தல் அமைந்திருந்தது.

உள்ளூராட்சி சபைகளில் பெண்களுக்கான 25 சதவீதமான ஒதுக்கீட்டை நிலைநாட்டும் நோக்கில் இடம்பெற்ற முதலாவது தேர்தலாகவும் அதனை அவதானிக்க முடியும்.

உள்ளூராட்சிச் சபை உறுப்பினர்களின் எண்ணிக்கையை 4,486 என்ற எண்ணிக்கையில் இருந்து 8,356 ஆக அதிகரிக்கும் நோக்கில் தேர்தல் திருத்தச் சட்டத்தின் பிரிவு 27 எப் க்கு ஏற்ப மாற்றங்கள் செய்யப்பட்டன. அதாவது ஒவ்வொரு உள்ளூராட்சி சபையிலும் மொத்த உறுப்பினர்களில் 25 சதவீதமானோர் பெண் உறுப்பினர்களாக இருக்க வேண்டும் என்பது இத் திருத்தத்தின் உள்ளடக்கம்.

இந்த அடிப்படையில் 1.8 சதவீதமாக இருந்த பெண்கள் பிரதிநிதித்துவத்துடன் ஒப்பிடும்போது 25 சதவீதம் அதிகரிப்பது மிகப் பெரிய தொகையாகும். ஆனால் எதிர்பார்க்கப்பட்டது போன்று 2018 ஆம் ஆண்டு இடம்பெற்ற உள்ளூராட்சி தேர்தல்களில் போட்டியிட்ட பெண்கள் வெற்றி பெற்ற எண்ணிக்கை மிகவும் குறைவு.

1.9 சதவீதமான பெண்களே உள்ளூராட்சி சபைகளில் அங்கம் வகித்திருந்ததாக பெண்கள் மற்றும் ஊடக கட்டமைப்பு அறிக்கை தெரிவித்திருந்தது.

இந்த ஆண்டு நடைபெற்ற தேர்தலிலும் 1.9 சதவீதமான பெண்கள்தான் வெற்றி பெற்றதாக தேர்தல்கள் ஆணைக்குழு தெரிவித்திருந்தது என்றார்.

அ. அச்சுதன்