1.18 லட்சம் விவசாயிகளுக்கு ஊட்டச்சத்து வேளாண் தொகுப்புகள்

ஆட்சியர் தகவல்

- 

சேலம், ஜூலை 4: வேளாண்மை துறை சார்பில் செயல்படுத்தப்படும் ஊட்டச்சத்து வேளாண்மை இயக்கத்தின் கீழ் சேலம் மாவட்டத்தில் 1.18 லட்சம் விவசாயிகளுக்கு ரூ. 96.13 லட்சத்தில் ஊட்டச்சத்து வேளாண் தொகுப்புகள் வழங்கப்படும் என ஆட்சியர் ரா.பிருந்தாதேவி தெரிவித்தார்.

சென்னையில் இருந்து காணொலிக் காட்சி வாயிலாக முதல்வர் மு.க.ஸ்டாலின் ஊட்டச்சத்து வேளாண்மை இயக்கத்தை வெள்ளிக்கிழமை தொடங்கிவைத்தார். அதைத் தொடர்ந்து சேலம், கன்னங்குறிச்சியில் நடைபெற்ற நிகழ்ச்சியில் மாவட்ட ஆட்சியர் ரா.பிருந்தாதேவி, மேயர் ஆ.ராமச்சந்திரன், சேலம் மக்களவை உறுப்பினர் டி.எம்.செல்வகணபதி ஆகியோர் விவசாயிகளுக்கு வேளாண் ஊட்டச்சத்து தொகுப்புகளை வழங்கினர்.

நிகழ்ச்சிக்கு பிறகு மாவட்ட ஆட்சியர் கூறியதாவது: தமிழக சட்டப் பேரவையில் வெளியிடப்பட்ட 2025-26 ஆம் ஆண்டுக்கான வேளாண் மற்றும் உழவர் நலத் துறை நிதிநிலை அறிக்கையில் அறிவித்த 'ஊட்டச்சத்து வேளாண்மை இயக்கம்' என்ற திட்டம் முதல்வர் மு.க.ஸ்டாலினால் தொடங்கப்பட்டுள்ளது.

உடல் நலன் பேண ஊட்டச்சத்து மிக்க உணவுகளை உட்கொள்வது அவசியம். இதில் காய்கறிகள், பழங்கள், பயறு வகைகள், சிறுதானியங்கள் பெரும் பங்காற்றுகின்றன. ஊட்டச்சத்துகளை வழங்கும் இந்த விளை பொருள்களின் உற்பத்தியை அதிகரித்து, ஊட்டச்சத்து பாதுகாப்பை உறுதி செய்வதுடன், உழவர்களின் வருவாயை உயர்த்தும் வகையில் இத்திட்டம் செயல்படுத்தப்பட்டுள்ளது.