போக்சோ வழக்கு குற்றவாளியை விடுவித்து உச்சநீதிமன்றம் தீர்ப்பு

சமூகம் மற்றும் சட்டத் துறையின் தோல்வியை சுட்டிக்காட்டி, போக்சோ வழக்கில் குற்றவாளி என்று தீர்ப்பளிக்கப்பட்ட நபருக்கு சிறைத் தண்டனை அளிக்காமல், அவரை உச்சநீதிமன்றம் விடுவித்து வெள்ளிக்கிழமை தீர்ப்பளித்தது.

- 

புது தில்லி, மே 24:

கடந்த 2018-ஆம் ஆண்டு மேற்கு வங்கத்தில் 25 வயது இளைஞருடன் சேர்ந்து வாழ 14 வயது சிறுமி வீட்டை விட்டு வெளியேறினார். இருவரும் திருமணம் செய்து கொண்ட நிலையில், அவர்களுக்குப் பெண் குழந்தை பிறந்தது.

எனினும் சிறுமி 18 வயது பூர்த்தியடையாதவர் என்பதால் பாலியல் குற்றங்களில் இருந்து குழந்தைகளைப் பாதுகாக்கும் போக்சோ சட்டம், இந்திய தண்டனைச் சட்டம் ஆகியவற்றின் கீழ் அந்த இளைஞர் மீது வழக்குப் பதிவு செய்யப்பட்டது.

இந்த வழக்கில் அவரை குற்றவாளி என்று மாநிலத்தில் உள்ள சிறப்பு போக்சோ நீதிமன்றம் தீர்ப்பளித்தது.

எனினும் அந்த இளைஞருக்கும், சிறுமிக்கும் இடையே ஏற்பட்ட உறவு ஒருவருக்கொருவர் சம்மதித்து ஏற்பட்டதாகவும், கட்டாயப்படுத்தப்பட்டு ஏற்படவில்லை என்றும் கூறியதுடன், அவர்களின் குடும்பச் சூழலை கருத்தில் கொண்டு, அந்த இளைஞர் குற்றவாளி என்று சிறப்பு நீதிமன்றம் அளித்த தீர்ப்பை கொல்கத்தா உயர் நீதிமன்றம் ரத்து செய்தது.