இந்தியாவுக்கு அமெரிக்கா ஆதரவு

பயங்கரவாதத் தாக்குதலுக்கு எதிரான தற்காப்பு நடவடிக்கை

- 

புது தில்லி, மே 1: பயங்கரவாதத் தாக்குதலுக்கு எதிரான இந்தியாவின் தற்காப்பு நடவடிக்கைகளுக்கு அமெரிக்கா ஆதரவு தெரிவித்ததாக மத்திய பாதுகாப்புத் துறை அமைச்சர் ராஜ்நாத் சிங் தெரிவித்தார்.

அமெரிக்க பாதுகாப்புத் துறை அமைச்சர் பீட் ஹெக்செத்தை ராஜ்நாத் சிங் வியாழக்கிழமை தொலைபேசியில் தொடர்புகொண்டு பேசினார். அப்போது, இந்தியா-பாகிஸ்தான் இடையே இப்போது எழுந்துள்ள பதற்றமான சூழல் குறித்து இருவரும் விவாதித்தனர்.

இது தொடர்பாக ராஜ்நாத் கூறியதாவது: பாகிஸ்தான் மூர்க்கத்தனமான நாடு என்பதும், பயங்கரவாதத்தை ஆதரிக்கும் நாடு என்பதும் வெளிப்பட்டுவிட்டது. சர்வதேச அளவில் பயங்கரவாதத்தை வளர்ப்பதிலும், பிராந்திய ஸ்திரத்தன்மையை சீர்குலைப்பதிலும் அந்த நாடு முக்கியப் பங்காற்றியுள்ளது. இதுபோன்ற செயல்களை ஒட்டுமொத்த உலகமும் கண்டிக்க வேண்டும் என்று அமெரிக்க அமைச்சரிடம் கூறினேன்.

அதற்கு, 'இனிமேலும் இது போன்ற பயங்கரவாத செயல்களை உலக நாடுகள் கண்டும் காணாமலும் இருக்க முடியாது. பயங்கரவாதத் தாக்குதலுக்கு எதிராக இந்தியா தன்னைப் பாதுகாத்துக் கொள்ள எடுக்கும் நடவடிக்கைகளுக்கு அமெரிக்கா முழு ஆதரவு அளிக்கும். இந்த விஷயத்தில் அமெரிக்கா இந்தியாவுடன் உறுதியாக துணை நிற்கும்' என்று ஹெக்செத் கூறினார்.

பயங்கரவாதத்தை யார் ஆதரித்தாலும் அது கண்டனத்துக்குரியது. இதுபோன்ற பயங்கரவாத ஆதரவு செயல்கள் உடனடியாகத் தடுக்கப்பட வேண்டும்' என்று ஹெக்செத் என்னிடம் கூறினார்.