தருமபுரி, கிருஷ்ணகிரி மாவட்டங்களில் காமராஜர் பிறந்த நாள் விழா

பென்னாகரம், ஏரியூர், பாப்பாரப்பட்டி பகுதிகளில் உள்ள அரசுப் பள்ளிகளில், காங்கிரஸ் கட்சி சார்பில் முன்னாள் முதல்வர் காமராஜரின் 123-ஆவது பிறந்த நாள் விழா செவ்வாய்க்கிழமை கொண்டாடப்பட்டது.

- 

தருமபுரி/ஒசூர்/பென்னாகரம், ஜூலை 15:

பென்னாகரத்தை அடுத்த செங்கனூர் ஊராட்சிக்கு உள்பட்ட சின்னப்பள்ளத்தூர் அரசு நடுநிலைப் பள்ளியில் நடைபெற்ற காமராஜர் பிறந்த நாள் விழாவுக்கு பள்ளித் தலைமை ஆசிரியர் மா.பழனி தலைமை வகித்தார். பள்ளி வளாகத்தில் வைக்கப்பட்டிருந்த மறைந்த முன்னாள் முதல்வர் காமராஜரின் படத்துக்கு மாலை அணிவித்து மரியாதை செலுத்தினார். அதைத் தொடர்ந்து காமராஜரால் கொண்டுவரப்பட்ட திட்டங்கள், நாட்டின் வளர்ச்சி, வாழ்க்கை வரலாறு குறித்து மாணவர்களுக்கு எடுத்துரைக்கப்பட்டது.

மாணவர்களுக்கான கட்டுரை, பேச்சு, ஓவியம், வினாடி-வினா போட்டிகள் நடத்தப்பட்டு, வெற்றி பெற்றவர்களுக்கு பரிசுகள் வழங்கப்பட்டன. ஆசிரியர்கள் வளர்மதி, கல்பனா, திலகவதி, ராஜேஸ்வரி, அனுப்பிரியா, சத்துணவு, அங்கன்வாடி, பள்ளி மேலாண்மைக் குழு உறுப்பினர்கள் உள்பட பலர் கலந்துகொண்டனர்.

இராமகொண்டஅள்ளி அரசுப் பள்ளி: ஏரியூர் அருகே இராமகொண்டஅள்ளி அரசு உயர்நிலைப் பள்ளியில் நடைபெற்ற காமராஜர் பிறந்த நாள் விழாவுக்கு பள்ளித் தலைமை ஆசிரியர் ரவிச்சந்திரன் தலைமை வகித்து அவரது உருவப்படத்துக்கு மாலை அணிவித்து மரியாதை செலுத்தினார். பள்ளியில் மாணவர்களுக்கான பேச்சு, கட்டுரை, ஓவியப் போட்டிகள் நடத்தப்பட்டு பரிசுகள் வழங்கப்பட்டன. நிகழாண்டில் தேசியத் திறனாய்வுத் தேர்வு, முதல்வர் திறனாய்வுத் தேர்வு உள்ளிட்டவைகளில் வெற்றி பெற்ற மாணவர்களுக்கும் பரிசுகள் வழங்கப்பட்டன.

மேலும், கல்வி வளர்ச்சி நாளில் 100 சதவீதம் தேர்ச்சி பெற உழைத்த ஆசிரியர்களுக்கு, தலைமையாசிரியர் சார்பில் நினைவுப் பரிசுகள் வழங்கப்பட்டன. தமிழாசிரியர்கள் சுப்பிரமணி, பெருமாள், ஆசிரியர்கள், மாணவர்கள் உள்ளிட்டோர் கலந்துகொண்டனர்.

அதேபோல பெரும்பாலை அருகே சாணாரப்பட்டி அரசுப் பள்ளியில் நடைபெற்ற கல்வி வளர்ச்சி நாள் விழாவுக்கு பள்ளியின் தலைமை ஆசிரியர் ஆனந்தி தலைமையில் கொண்டாடப்பட்டு மாணவர்களுக்கு பரிசுகள் வழங்கப்பட்டன.