રાજકાજ

દિલ્હી વિસ્ફોટઃ ત્રાસવાદનું ફરિદાબાદ મોડ્યૂલ સક્રિય

- ચાણક્ય

પાટનગર દિલ્હીમાં ૧૦ નવેમ્બરની સાંજે લાલ કિલ્લા નજીક મેટ્રો સ્ટેશનના ગેટ નંબર એક પાસે પ્રચંડ કાર વિસ્ફોટમાં તેર લોકોએ જાન ગુમાવ્યા અને બીજા ત્રીસેક લોકોને ઈજા થઈ હતી. ૬ ને ૫૨ મિનિટે થયેલો આ વિસ્ફોટ એટલો પ્રચંડ હતો કે આસપાસના લોકો તેની ઝપટમાં આવી ગયા. કેટલાક મૃતદેહનાં અંગો જુદી-જુદી જગ્યાએ વિખરાયેલાં પડ્યાં હતાં. એક મૃતદેહ બાજુના વૃક્ષ ઉપર લટકી રહ્યો હતો. સુરક્ષા એજન્સીના લોકોની નજર તેના પર ગઈ હતી. આઇ-૨૦ કારમાં થયેલા વિસ્ફોટની તીવ્રતા કેટલી હતી તેનો એ સંકેત છે. શક્તિશાળી વિસ્ફોટને કારણે આસપાસના પચાસ મીટરના ઘેરાવામાં સિમેન્ટ-કોંક્રિટ ફાટવાના અને કાચના ભુક્કા બોલી જવાની ઘટનાઓ બની હતી. હવામાં ધાતુના ટુકડાઓ અને આગના ગોળા ઊછળ્યા હતા. તેની અસર મેટ્રો સ્ટેશન અને બાજુના મંદિર પર પણ જોવા મળી હતી.

નજરે જોનારાઓના જણાવવા પ્રમાણે અત્યંત તીવ્ર પ્રકાશ અને વિસ્ફોટની ગર્જનાથી આ વિસ્તાર ધ્રુજી ઊઠ્યો હતો. એકદમ ભૂકંપ જેવો આંચકો અનુભવાયો હતો. કેટલાક મૃતદેહ બળીને કાળા પડી ગયા હતા. ધડ અને માથું અલગ થઈ ગયાં હતાં. એ સ્થિતિમાં મૃતકોની ઓળખાણ મુશ્કેલ બની હતી. ઈજાગ્રસ્તોને સારવાર માટે એલએનજેપી હૉસ્પિટલમાં લઈ જવાયા હતા. વિસ્ફોટની તપાસ માટે દિલ્હી પોલીસ ઉપરાંત એફએસએલ અને એનઆઇ એ જેવી એજન્સીઓ પણ સક્રિય બની હતી.