ഓൺലൈനായി വിൽക്കാം അധികവില നേടാം

ഉൽപന്നങ്ങൾ ഉപഭോക്താക്കൾക്ക് ഓൺലൈനിൽ വിൽപന നടത്തി പൊതുവിപണിയിലെക്കാൾ മികച്ച വില നേടുന്ന കർഷകൻ

- ജയിംസ് ജേക്കബ്

ഒരു കിലോ ഏലക്കാ വിറ്റാൽ ഇപ്പോൾ കൃഷിക്കാരന് എന്തു കിട്ടും? ശരാശരി 2,500 രൂപ, പരമാവധി 2,700 രൂപ. എന്നാൽ, ഇടുക്കി കട്ടപ്പനയ്ക്കു സമീപം എറമ്പടത്തെ ജോജോ 2,850-3,300 രൂപ നിരക്കിലാണ് ഏലക്കാ വിൽക്കുന്നത്. ഇക്കഴിഞ്ഞ സീസണിൽ തന്റെ ഏലക്കാ മുഴുവൻ ഈ വിലയ്ക്കാണ് വിറ്റതെന്നു ജോജോ പറയുന്നു. ഏലക്കാ മാത്രമല്ല, കുരുമുളകും കുടംപുളിയും കാപ്പിക്കുരുവും ഗ്രാമ്പു വും ജാതിപത്രിയും കാന്താരിമുളകും കറുവപ്പട്ടയും ഉണങ്ങിയ കറിവേപ്പിലയും ചുക്കും മഞ്ഞളുമൊക്കെ ഇപ്രകാരം താൻ നിശ്ചയിക്കുന്ന വിലയ്ക്കാണ് ജോജോ വിൽക്കുന്നത്.

ഏലക്കായും കുരുമുളകുമൊക്കെ ചാക്കിൽ കെട്ടിവച്ച് വിൽക്കാൻ സമയം കാത്തിരിക്കുകയാണോ താങ്കൾ? വിപണിയിലെ ഏറ്റക്കുറവുകൾ ശരിയായി വിശകലനം ചെയ്യാനും വില ഉയരാനുള്ള സാധ്യതകൾ മനസ്സിലാക്കാനും കഴിയുന്നില്ലേ താങ്കൾക്ക്? അർഹമായ വില കിട്ടുന്നില്ലെന്നും ഇടനിലക്കാർ ലാഭം വിഴുങ്ങുന്നെന്നും പരാതിയുണ്ടോ? എങ്കിൽ നിങ്ങൾക്കു ജോജോ വഴി കാട്ടും.

വീടിനോടു ചേർന്നുള്ള സ്വന്തം പറമ്പിലെ വ്യത്യസ്ത വിളകൾ വിൽക്കാൻ ജോജോയ്ക്ക് തനതു വഴിയുണ്ട് ഓൺലൈൻ ചില്ലറ വ്യാപാരം. അതുവഴി അദ്ദേഹം ഇന്ത്യയിലെമ്പാടും തന്റെ ഉൽപന്നങ്ങൾക്ക് ഉപഭോക്താക്കളെ കണ്ടെത്തുന്നു. വ്യാപാരി പറയുന്ന വിലയ്ക്കല്ല, താൻ നിശ്ചയിക്കുന്ന വിലയ്ക്കാണ് ജോജോയുടെ വിൽപന.