തിരുത്തിയെഴുത്ത്

കഥക്കൂട്ട്

- തോമസ് ജേക്കബ്

ഞാൻ എഴുതിയത് എഴുതി എന്നു തിരുത്തില്ലാതെ പറഞ്ഞത് പീലാത്തോസാണ്. മറ്റുള്ളവരൊക്കെ മാറ്റിയെഴുതാൻ തയാറുള്ളവരായിരുന്നു.

ഹെമിങ്വേ, പ്രസാധകന്റെ കയ്യിൽ നിന്ന് 164 തവണ തിരിച്ചുവാങ്ങി തിരുത്തലുകൾ വരുത്തിയ കൃതിയാണ് Oldman and the Sea. ഇനിയും തിരിച്ചുവാങ്ങി തിരുത്തിയാൽ തന്റെ എഴുത്തുജീവിതം ഞാൻ തുലയ്ക്കും എന്നു പ്രസാധകൻ ഭീഷണിപ്പെടുത്തിയപ്പൊഴാണ് പണിക്കുറ്റങ്ങൾ തീർത്തുകൊടുത്തത്.

“യുദ്ധവും സമാധാനവും' (War and Peace) എന്ന ലോകപ്രശസ്ത കൃതി ആറു പ്രാവശ്യം തിരുത്തിയെഴുതിയിട്ടുണ്ട്, ലിയോ ടോൾസ്റ്റോയി. ആറു പ്രാവശ്യവും അതു പകർത്തിയെഴുതിയത് ഭാര്യ സോഫിയ ആയിരുന്നു. ടോൾസ്റ്റോയിയുടെ പതിമൂന്നു കുട്ടികളെ പ്രസവിക്കുന്നതു പോലുള്ള ഒരു ഉത്തരവാദിത്തമായിക്കണ്ട്, ടോൾസ്റ്റോയിയുടെ എല്ലാ കൃതികളും പലവട്ടം പകർത്തിക്കൊടുത്തു, അവർ. ദസ്തയേവ്സ്കി "കുറ്റവും ശിക്ഷയും' ആറുതവണ മാറ്റിയെഴുതി.