ജീവൻപോയാലും വേണ്ടില്ല എന്നെ തൊടരുത്

ഒരുപാട് പോരാട്ടങ്ങളിലൂടെയാണ് നാം ഇന്നത്തെ നിലയിൽ എത്തിയത്. അത്തരം ചില സംഭവങ്ങൾ മുത്തശ്ശിയോ മുതിർന്നവരോ കുട്ടികൾക്ക് പരിചയപ്പെടുത്തുന്നു - ചരിത്രത്തി ൽനിന്നും അടർത്തിയെടുത്ത ഒരു കഥയിലൂടെ. നിങ്ങളുടെ നാട്ടിലും ഇത്തരം സംഭവങ്ങളുണ്ടാവും. അവയെക്കുറിച്ച് അന്വേഷിച്ച് യുറീക്കയ്ക്ക് എഴുതണേ...

- ഡോ. ടി.പി.കലാധരൻ

മുത്തശ്ശി, ഒരു സംശയമുണ്ട്. രാജാക്കന്മാരൊക്കെ പ്രജാക്ഷേമ തല്പരരാകണ്ടേ?”

“തീർച്ചയായും.

“അപ്പോൾ എല്ലാ പ്രജകളുടെയും സുഖ ജീവിതം അവർ ഉറപ്പാക്കണ്ടേ?

 വേണം. വളച്ചുകെട്ടാതെ കാര്യം പറ മോളേ.

“അയിത്തം മൂലം ജനങ്ങൾ കഷ്ടപ്പെട്ടിരുന്നു എന്നല്ലേ മുത്തശ്ശി പറയാറ്. അപ്പോൾ രാജാക്കന്മാരെന്താ ചെയ്തത്?

അവര് അയിത്തത്തിന്റെയും രാജാക്കന്മാരായിരുന്നു. ഉദാഹരണങ്ങൾ ചരിത്രപുസ്തകങ്ങളിൽ ഉണ്ട്. കേട്ടാൽ വിശ്വാസം വരില്ല. ചിലത് പറയാം. ഒരു രാജാവ് രോഗം വന്ന് ചാകാറായി. എന്നിട്ടും ഡോക്ടറെ അടുപ്പിച്ചില്ല. കാരണം ഡോക്ടറ് താഴ്ന്ന ജാതിക്കാരനാ.

"അതേതാ ആ രാജാവ്?

തിരുവിതാംകൂറിലെ മൂലം തിരുനാൾ രാജാവ്. പല്ലു കേടുവന്നു പഴുത്തു. അത് എടുത്തുകളയാൻ ഡോക്ടറെ അനുവദിച്ചില്ല. പഴുപ്പ് കൂടി രക്തത്തിൽ അണുബാധ വന്ന് ചത്തുപോയി.

 “രാജാവ് ചത്തുപോയി എന്നല്ല, നാടു നീങ്ങീന്ന് പറ മുത്തശ്ശി.

“ആചാരഭാഷയെക്കുറിച്ച് പിന്നൊരിക്കൽ പറയാം. മുത്തശ്ശി തുടർന്നു

“മറ്റൊരു രാജാവായിരുന്നു വിശാഖം തിരുനാൾ. 1885 ൽ ആസന്നമരണനായി കിടക്കുമ്പോൾ ഭാര്യയെയും മക്കളെയും കാണാനേ അനുവദിച്ചില്ല. ഡോക്ടർക്കും അദ്ദേഹത്തെ കാണാൻ അവസരം ലഭിച്ചില്ല. അദ്ദേഹത്തെ തൊടുന്നതിന് ബ്രാഹ്മണരെ മാത്രമേ അനുവദിച്ചുള്ളൂ.

എന്തൊരു രാജാക്കന്മാരാ മുത്തശ്ശീ ഇവരൊക്കെ?” കുട്ടികൾ മൂക്കത്ത് വിരൽ വെച്ചു.

“ബാക്കി കൂടി കേൾക്ക്. കൊട്ടാരം വൈദ്യനായിരുന്നു ഡോ. ലക്ഷ്മൺ. ഇംഗ്ലണ്ടിൽ പോയി പഠിച്ചാണ് യോഗ്യത നേടിയത്. അദ്ദേഹം താഴ്ന്ന ജാതിക്കാരനാണ്. രോഗികൾ ഉയർന്ന ജാതിക്കാരും. ചികിത്സ എങ്ങനെയാണെന്നോ? ബ്രാഹ്മണനായ സഹായി രോഗിയെ തൊട്ടുനോക്കി ലക്ഷണങ്ങൾ മനസ്സിലാക്കി ഡോക്ടറോടു ഉച്ചത്തിൽ വിളിച്ചുപറയും. ഡോക്ടർ അതു കേട്ടു ചികിത്സ തീരുമാനിക്കും.