ഹൈബ്രിഡ് കരുത്തിൽ ഇന്നോവ

മോണോകോക്ക് ഷാസി, ലീറ്ററിന് 21.1 കിമീ ഇന്ധനക്ഷമത ഉള്ള ഹൈബ്രിഡ് എൻജിൻ, നൂതന സുരക്ഷാ ഫീച്ചറുകൾ, മികച്ച യാത്രാസുഖം. വിപണി കീഴടക്കാൻ പുതിയ ഇന്നോവ

- നോബിൾ

എംപിവി സെഗ്മെന്റിലെ കിരീടം വയ്ക്കാത്ത രാജാവ്, ഇന്ത്യൻ നിരത്തിലെ നമ്പർ വൺ ഫാമിലി കാർ എന്നിങ്ങനെ വിശേഷണങ്ങൾ ഒട്ടേറെ നൽകിയാലും മതിയാകില്ല ടൊയോട്ടയുടെ എക്കാലത്തെയും ഹിറ്റ് മോഡലായ ഇന്നോവയ്ക്ക്. പതിനേഴു വർഷത്തിലേറെയായി ഇന്നോവയെന്ന എംപിവി നിരത്തിലൂടെ സുഖസവാരി നൽകി പായാൻ തുടങ്ങിയിട്ട്. രാഷ്ട്രീയക്കാരുടെ നേതാക്കൻമാരുടെ, സർക്കാർ വകുപ്പുകളുടെ എല്ലാം ഇഷ്ട വാഹനമായി മാറിക്കഴിഞ്ഞു ഇന്നോവ. ഇന്നോവയില്ലായിരുന്നെങ്കിൽ ടൂർ ഓപ്പറേറ്റർമാർ എന്തുചെയ്തേനെ എന്നു തോന്നിപ്പോകുന്ന തരത്തിലാണ് ടൂറിസം രംഗത്ത് ഇന്നോവയുടെ സാന്നിധ്യം.

2005 ൽ ആണ് ഇന്നോവ ഇന്ത്യൻ മണ്ണിലെ ജൈത്രയാത്രയ്ക്കു തുടക്കം കുറിക്കുന്നത്. അന്നു വിപണിയിൽ താരമായിരുന്ന ക്വാളിസിനെ പിൻവലിച്ചാണ് ഇന്നോവയെ ടൊയോട്ട കളത്തിലിറക്കിയത്.

വിപണിയിലെ ഹിറ്റായ ക്വാളിസിനെ പിൻവലിച്ചത് മണ്ടത്തരമെന്നു തുടക്കത്തിൽ പറഞ്ഞവർ ഇന്നോവയുടെ വളർച്ച കണ്ട് അന്തംവിട്ടുപോയെന്നു മാത്രം. ഇപ്പോഴിതാ ഇന്നോവ മറ്റൊരു ചരിത്ര തുടക്കത്തിന്റെ പാതയിലേക്ക് സ്റ്റിയറിങ് തിരിച്ചിരിക്കുന്നു. അടിമുടി ഡിസൈൻ മാറ്റവും പുതിയ ഹൃദയവുമൊക്കെയായി എത്തിയ ഇന്നോവ ഹൈക്രോസിന്റെ വിശേഷങ്ങളിലേക്ക്..

മാറ്റം ഒറ്റനോട്ടത്തിൽ

 ഇന്നോവ ഹൈക്രോസിലെന്തു പുതുമ എന്നു ചോദിച്ചാൽ, അടിമുടി മാറ്റം എന്നു പറയാം. ഷാസി, ഡിസൈൻ, കംഫർട്ട്, ഫീച്ചേഴ്സ് എന്നിവയിലെല്ലാം കാതലായ മാറ്റമുണ്ട്. വലുപ്പം കൂടി. ഇന്റീരിയർ പ്രീമിയം ആയി. മാത്രമല്ല, എടുത്തുപറയേണ്ട വലിയ സവിശേഷത വെൽഫയറിനെയും കാമിയെയും പോലെ ഹൈബ്രിഡ് ഹൃദയം വന്നു എന്നതാണ്.

മാസ് ലുക്ക്

മാസ് ലുക്ക് എസ് യു വികൾക്കു മാത്രം എന്ന കാഴ്ചപ്പാട് ഹൈഡർ മാറ്റിയെഴുതുന്നു. എസ് യു വികളുടേതിനു സമാനമായ മുൻഭാഗമാണ്. മസ്കുലർ ബോണറ്റും കനമേറിയ ലൈനിങ്ങോടുകൂടിയ വലിയ ഹെക്സാഗണൽ ഗ്രില്ലും വശങ്ങളിലേക്കു കയറി നിൽക്കുന്ന ഹെഡ്ലാംപും ഹൈഡറിന്റെ മാസ് കൂട്ടുന്നു. മാറ്റ് സിൽവർ ഇൻസേർട്ടോടുകൂടിയ വലിയ ബംപറിലാണ് ഇൻഡിക്കേറ്റർ ഡേ റണ്ണിങ് ലാംപിന്റെ സ്ഥാനം. ചെറിയ എയർ ഡാം. അതിനരികി ലായി ചെറിയ ഫോഗ് ലാംപ് ഹെഡ്ലൈറ്റും ടെയിൽ ലൈറ്റും എൽഇഡിയാണ്.