കിച്ചൻ ഭംഗിയാക്കാൻ നുറുങ്ങു വിദ്യകൾ

കൃത്യമായ സ്റ്റോറേജ് സൗകര്യം ഉണ്ടെങ്കിൽ അടുക്കള എപ്പോഴും വൃത്തിയായിരിക്കും

- സോണിയ ലിജേഷ് ഇന്റീരിയർ ഡിസൈനർ ക്രിയേറ്റീവ് ഇന്റീരിയോ, കൊടകര, തൃശൂർ [e-mail]

ആളുകൾ കൂടുതൽ സമയം നിൽക്കുന്നതും എന്നാൽ കുറച്ചു സമയം മാത്രം നിൽക്കാൻ ഇഷ്ടപ്പെടുന്നതുമായ സ്ഥലമാണ് കിച്ചൻ. ഇവിടെ നടത്തം ലാഭിക്കുകയും അതേസമയം കാര്യങ്ങൾ എളുപ്പത്തിൽ ചെയ്യുകയും വേണം, അതാണ് നല്ല ഡിസൈൻ കൊണ്ട് ഉദ്ദേശിക്കുന്നത്. ഭംഗിയേക്കാൾ കൂടുതലായി ഉപയോഗക്ഷമതയ്ക്കു വേണം പ്രാധാന്യം കൊടുക്കാൻ.

കിച്ചന്റെ സ്ഥാനം വളരെ പ്രധാനമാണ്. പ്രഭാതത്തിലെ സൂര്യരശ്മികൾ പതിക്കത്തക്കവിധം കിഴക്കുവശത്തേക്ക് വരുന്ന വിധത്തിലാണ് കിച്ചൻ ക്രമീകരിക്കാറുള്ളത്. തീരെ ജനൽ കൊടുക്കാൻ പറ്റാത്തിടത്ത് ഏഴ് അടിക്കു മുകളിലായി ജനലുകൾ കൊടുക്കാം. പക്ഷേ, വാർക്കുമ്പോൾ അതനുസരിച്ച് വേണമെന്നതിനാൽ പ്ലാനിങ്ങിൽ തന്നെ ഇക്കാര്യം ശ്രദ്ധിക്കാം.

സ്പേസ് അനുസരിച്ചാണ് കിച്ചന്റെ ലേഔട്ട്. ആവശ്യത്തിനു സ്ഥലമുള്ളിടത്താണ് ഐലൻഡ് കിച്ചൻ ചെയ്യാൻ സാധിക്കുക.